الەم مۇنداي جاعدايدى ەشقاشان باستان كەشپەگەن. 7 ايدان بەرى اۋىزدىقتالماعان ىندەتتىڭ زاردابى مەن قيىندىعىن وزگەدەن بۇرىن دەنساۋلىق ساقتاۋ مينيسترلەرى كورىپ كەلە جاتقانى انىق. سىن ساعاتتا حالقىن امان ساقتاپ قالۋ ءۇشىن جانكەشتىلىكپەن قىزمەت ەتىپ جۇرگەن مينيسترلەرمەن قوسا مورت سىنىپ، جۇرتىن جولايرىقتا قالدىرىپ كەتكەندەرى دە بار. تومەندە پاندەميا كەزىندە وتستاۆكاعا كەتكەن مينيسترلەر ءتىزىمىن ۇسىنىپ وتىرمىز، بۇل جاقسى ما، جامان با؟
ۋكراينانىڭ بۇرىنعى دەنساۋلىق ساقتاۋ ءمينيسترى يليا ەمەتس وتە قىسقا مەرزىمدە ءوزىنىڭ ىندەتتىڭ تارالۋى جونىندەگى مالىمدەمەلەرىنىڭ جانجال تۋدىرۋى سالدارىنان قىزمەتىنەن بوساتىلعان.
ول ءبىر سوزىندە ەلدەگى بارلىق زەينەتكەر ۆيرۋس سالدارىنان قايتىس بولاتىنىن ايتسا، ەندى ءبىر سوزىندە كاسىپكەرلەرگە ۆيرۋسپەن كۇرەسكە قولداۋ ءبىلدىرۋىن سۇراي وتىرىپ، «مايىتتەرگە» اقشا شىعىنداماۋعا بولاتىنىن جەتكىزگەن. 64 جاسار ءمينيستردىڭ سوزىنشە، «مايىتتەر» – 65 جاستان اسقان قاريالار كورىنەدى.
ناۋرىز ايىندا، الەمدە پاندەميانىڭ ءورشىپ تۇرعان شاعىندا رۋمىنيا دەنساۋلىق ساقتاۋ ءمينيسترى ءوز مىندەتىن دۇرىس اتقارا الماعانى ءۇشىن ورنىن بوساتقان. سۋچاۆا رۋمىن پروۆينتسياسىندا دارىگەرلەر ۆيرۋس جۇقتىرىپ، قالاداعى ەكى بىردەي اۋرۋحانا دەزينفيكتسيا ءۇشىن جابىلعان. ناتيجەسىندە ناۋقاستاردى ەمدەيتىن ورىن مەن ماماندار جەتىسپەي، حالىق مينيستر قىزمەتىنە نارازىلىعىن بىلدىرگەن.
ءساۋىر ايىنىڭ باسىندا شوتلانديانىڭ دەنساۋلىق ءمينيسترى كەترين كالدەرۆۋد COVID-19 ۆيرۋستىڭ تارالۋىنا بايلانىستى ەنگىزىلگەن كارانتيندىك شارتتاردى بۇزعانى ءۇشىن قىزمەتىنەن كەتۋگە شەشىم قابىلداعان. حالىقتى ۇيدەن شىقپاۋعا ۇندەگەن ول وتباسىمەن بىرگە ەكى رەت ەدينبۋرگتەن شىعىپ، قالا سىرتىنداعى ساياجايىنا بارعان. ءمينيستردىڭ بۇل ارەكەتى باق وكىلدەرىنىڭ نازارىنان تىس قالماي، ابدەن سىنعا ۇشىراعان.
برازيليادا ءبىر ايدا 2 دەنساۋلىق ساقتاۋ ءمينيسترى وتستاۆكاعا كەتكەن. ءساۋىر ايىندا برازيليا پرەزيدەنتى جاير بولسونارۋ دەنساۋلىق ءمينيسترىنىڭ ۆيرۋسقا قارسى ۇيىمداستىرعان شارالارىن قۇپتاماي، ورنىنا نەلسون تەيچتى تاعايىنداعان. ايتسە دە، بۇل مينيستر دە مەملەكەت باسشىسىمەن كەلىسپەي، ءبىر ايعا جەتپەي-اق ورنىن بوساتقان.
پرەزيدەنت جاير بولسونارۋ ءمينيستردىڭ شەشىمى تىم قاتاڭ ەكەندىگىن، شەكتەۋلەردى تەزىرەك الىپ تاستاۋ كەرەك ەكەندىگىن ايتقان. ال مينيسترلىك باسشىنىڭ بۇل شەشىمىن قۇپتاماعان. سونىڭ سالدارىنان بۇل ەلدە ىندەت قاتتى ءورشىپ، اقش-تان كەيىنگى ەڭ كوپ زارداپ شەككەن مەملەكەت بولىپ وتىر. 23 شىلدە كۇنى برازيليادا 67 مىڭنان استام ادامنان COVID-19 ۆيرۋسى تابىلىپ، ءبىر كۇندىك انتيرەكورد تىركەلگەن. پرەزيدەنت جاير بولسونارۋدەن وسى ايدا ءۇش رەت ۆيرۋس بار ەكەندىگى انىقتالعان. الايدا، ەل ىشىندەگى جاعدايعا قاراماستان، ءدال قازىر برازيليادا كوروناۆيرۋسكە قارسى ۆاكتسينا سىناقتان وتۋدە. پرەپاراتتىڭ جارامدىلىعىن تەكسەرۋگە 9 مىڭنان استام ەرىكتى قاتىسۋى مۇمكىن.
جاڭا زەلانديانىڭ دەنساۋلىق ساقتاۋ ءمينيسترى دەۆيد كلارك ءساۋىر ايىندا قاتاڭ تۇردە ەنگىزىلگەن كارانتين ريجىمىنە قاراماستان جاعاجايعا بارعانىن مويىنداپ، وتستاۆكا كەتۋدى ۇيعارعان. بىراق پرەمەر مينيستر دجاسيندا اردەرن ول ۋاقىتتا: «قالىپتى جاعدايدا مەن دەنساۋلىق ساقتاۋ ءمينيسترىن قىزمەتىنەن بوساتار ەدىم. ول قاتەلىك جاسادى جانە ونى ەشنارسە دە اقتاي المايدى. بىراق ءدال قازىر مەن ءۇشىن ماڭىزدىسى – بىزدىڭ COVID-19-عا قارسى ۇجىمدىق كۇرەسۋىمىز»، - دەپ كەيىنگە شەگەرگەن. مينيستر شىلدە ايىنىڭ باسىندا قىزمەتىن بوساتتى.
سونداي-اق تۇركيانىڭ ىشكى ىستەر ءمينيسترى سۇلەيمان سويلۋ 11 ءساۋىر ساعات 00.00-دەن 12 ءساۋىردىڭ كەشىنە دەيىن 31 پروۆينتسياعا ەنگىزىلگەن كومەندانتتىق ساعاتتان ەل ىشىندە تۋعان اجيوتاجعا بايلانىستى جاۋاپكەرشىلىكتى وزىنە الىپ، وتستاۆكاعا كەتەتىنىن مالىمدەگەن. الايدا بۇقارا حالىق الەۋمەتتىك جەلىلەردە ەردوعاننىڭ كەلىسىمىن تاپقان بۇل كومەندانتتىق ساعات ءۇشىن ءمينيستردىڭ وتستاۆكاعا كەتۋىنە قارسىلىعىن ءبىلدىرىپ، مينيسترگە قولداۋ كورسەتكەن. ناتيجەسىندە پرەزيدەنت ەردوعان مينيستر سويلۋدى ورنىندا قالدىرادى.
ەستەرىڭىزگە سالا كەتەيىك، 25 ماۋسىمدا مەملەكەت باسشىسىنىڭ جارلىعىمەن ەلجان امانتايۇلى ءبىرتانوۆ قازاقستان رەسپۋبليكاسىنىڭ دەنساۋلىق ساقتاۋ ءمينيسترى قىزمەتىنەن بوساتىلعان-دى. ەكس-مينيستر كورونوۆيرۋس جۇقتىرۋىنا بايلانىستى مەملەكەت باسشىسىنا ءوتىنىش بەرگەن.
ايجان قۇرمانباي،
"ادىرنا" ۇلتتىق پورتالى.
