ول جاڭا ەڭبەگىندە جاستار اراسىنداعى قوعام دەرتىنە اينالعان وزەكتى ماسەلەلەردى جازعان.
الماتىدا جاس قالامگەر ءجاميليا باقتيارقىزىنىڭ جاڭا كىتابىنىڭ تۇساۋكەسەر ءراسىمى ءوتتى.
ءوزى اقىن، ءوزى جازۋشى ارۋدىڭ تۋىندىسى «قارلىعاش ماحاببات ەسكەرتكىشى» دەپ اتالادى. ول جاڭا ەڭبەگىندە جاستار اراسىنداعى قوعام دەرتىنە اينالعان وزەكتى ماسەلەلەردى جازعان. ال قالامگەردىڭ ۇستازى ونىڭ وقۋعا كىشكەنتايىنان زەرەك بولعانىن ايتادى.
«مەكتەپ كەزدەن وتە جاقسى وقيتىن، مەنىڭ وقۋشىم بولعان. بىلىمگە دەگەن قۇشتارلىعى وتە جوعارى بولاتىن. ءوزىنىڭ زەرەكتىگى ارقاسىندا مىنانداي كەرەمەت تۋىندىلار ومىرگە كەلىپ وتىر»، – دەدى قازاقستاننىڭ ەڭبەك ەرى اياگۇل ميرازوۆا.
ءجاميليا باقتيارقىزىنىڭ ەكى جىل بۇرىن جارىق كورگەن تىرناقالدى تۋىندىسى الەمنىڭ 6 تىلىنە اۋدارىلعان. العاشقى ەڭبەگىندە 10 جىل جانىن قيناعان دەرتپەن الىسا ءجۇرىپ، باسىنان كەشكەن تالاي ساتتەرىن قاعازعا تۇسىرگەن جاس جازۋشىنىڭ ءورشىل، تاباندى مىنەزى وقىرماننىڭ كوڭىلىن تولقىتقان ەدى.
«ءجاميليا ءوزىنىڭ جان دۇنيەسىمەن، ومىردەن كورگەنى بار، بىلگەنى بار، كورگەن قيىندىعى مەن قۋانىشتارىن قاعاز بەتىنە ءتۇسىرىپ جۇرەتىن. سونىڭ بارلىعى «بايشەشەك» كىتابىندا جازىلعان. ال ەندى «قارلىعاش ماحاببات ەسكەرتكىشى» تۋىندىسى – باسقا»، – دەدى قازاقستاننىڭ ەڭبەك سىڭىرگەن قايراتكەرى اسىلى وسمان.
