مەملەكەت باسشىسى ىشكى ىستەر مينيسترلىگىنىڭ القا ءماجىلىسىن وتكىزدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ ءتارتىپ ساقشىلارىنىڭ قىزمەتىنە توقتالدى.
«ءتارتىپ ساقشىلارىنىڭ قىزمەتى وڭاي ەمەس. كۇنى-ءتۇنى جۇمىس ىستەيتىن كەزدەر ءجيى بولادى. قاۋىپ-قاتەر دە بار. تاۋلىك بويى، ياعني 24 ساعات بويى ساقاداي ساي بولۋ ءۇشىن ەرەكشە قاجىر-قايرات پەن توزىمدىلىك قاجەت. سەبەبى قيىن جاعدايعا تاپ بولعان جاندار، ەڭ الدىمەن، پوليتسيادان كومەك كۇتەدى. ازاماتتارىمىز سىزدەرگە مەملەكەتتىڭ، ياعني بيلىكتىڭ وكىلى رەتىندە قارايدى. قاۋىپ-قاتەردەن قورعايدى دەپ سەنەدى. سوندىقتان سىزدەرگە ءاردايىم وراسان زور جاۋاپكەرشىلىك جۇكتەلەدى»،—دەدى ول.پرەزيدەنت كوپتەگەن قازاقستاندىقتىڭ الاياقتارعا الدانىپ قالىپ جاتقانىن دا اتاپ ءوتتى.
«مەن بۇگىن قوعامدا وزەكتى بولىپ تۇرعان تاعى ءبىر ماسەلەگە توقتالعىم كەلەدى. قازىر كوپتەگەن ازاماتتارىمىز الاياقتاردىڭ ايلاسىنا ءتۇسىپ، الدانىپ قالىپ جاتىر. سوندىقتان قۇقىق قورعاۋ ورگاندارى الاياقتارعا قارسى تاباندى كۇرەس جۇرگىزۋگە ءتيىس. ولارعا ەشقانداي جەڭىلدىك جاسالماۋى كەرەك. سەبەبى الاياقتاردىڭ جاساعان ارەكەتىنەن حالىق زارداپ شەگۋدە. مىسالى، جاقىندا ءبىر تۋريستىك كومپانيا زاڭعا باعىناتىن ءبىر توپ ازاماتتى الداپ، ولاردى قاجىلىققا جىبەرگەن. ەندى، كىناسىز ادامدار ساۋد ارابياسىنىڭ پوليتسيا ۋچاسكەسىندە قاماۋدا وتىرۋعا ءماجبۇر. وسىنداي الاياق كومپانيانىڭ زاڭعا قايشى ارەكەتى ازاماتتارىمىزدىڭ دەنساۋلىعىنا، ولاردىڭ مورالدىق جاعدايىنا جانە جالپى ەلىمىزدىڭ بەدەلىنە ۇلكەن نۇقسان كەلتىرىپ وتىر. بۇل جەردە، ارينە، ادامداردىڭ قۇقىقتىق ساۋاتسىزدىعى دا بار. ەندى، مەملەكەتىمىز، ياعني سىرتقى ىستەر مينيسترلىگى ولارعا بارىنشا كومەكتەسۋى قاجەت. ال ىشكى ىستەر مينيسترلىگى الاياق كومپانيانىڭ باسشىلىعىن، قىزمەتكەرلەرىن زاڭعا سايكەس جاۋاپقا تارتۋعا ءتيىس. ادىلەتتى قوعام قۇرامىز دەسەك، ءدال وسىنداي وزەكتى ماسەلەلەردى شەشۋىمىز كەرەك»،—دەدى توقاەۆ.
