ارون اتابەك تاريحتا «شاڭىراق وقيعاسى» دەپ اتى قالعان، پوليتسيا قىزمەتكەرىنىڭ ولىمىنە اكەپ سوققان كوتەرىلىستى ۇيىمداستىردى دەگەن ايىپپەن18 جىلعا قاماۋعا الىنعان ەدى. قىزى الما نۋتۋشەۆا تەمىرتوردا عۇمىرىنىڭ 15 جىلىن وتكىزگەن اكەسىن اقتاپ الۋدى سۇرايدى. ول وسى ماقساتتا الەۋمەتتىك جەلىدە پرەزيدەنت قاسىم-جومارت توقاەۆقا ارناپ جازبا قالدىردى.
«قاسىم-جومارت كەمەلۇلى! جولداۋدى تىڭداعاننان كەيىن مەن ءسىزدىڭ ەلدەگى بارلىق جاعدايدى جاقسارتۋدى كوزدەگەنىڭىزدى كوردىم. مەن ءسىزدىڭ بۇل باعدارلاماڭىزعا قازاقستاننىڭ جازىقسىز سوتتالعان ادامدارىن اقتاپ الۋدى قوسۋىڭىزدى سۇرايمىن»،-دەپ جازدى الما نۋتۋشەۆا.
قىزىنىڭ ايتۋىنشا، اكەسىنە تاعىلعان ايىپتار نەگىزسىز. اكەسىنىڭ تۇرمەدەن دارمەنسىز كۇيدە ۇيىنە ورالعانىن العا تارتقان ارون اتابەكتىڭ قىزى، ونىڭ قاپاستاعى 15 جىلى ازاپقا تولى بولعانىن العا تارتتى.
«نەلىكتەن مانياكتار مەن كىسى ولتىرۋشىلەر 20 جىلدان كەيىن دەنى ساۋ بولىپ شىعادى؟ ال اكەمدى سونشا ازاپتاعاندارى قالاي، ەندى ونى ماعان كىم قايتارادى؟»،-دەپ اشىندى الما نۋتۋشەۆا.
ارون اتابەك كوزى تىرىسىندە شارتتى تۇردە بوساپ شىعۋدان باس تارتىپ، تولىق اقتاۋدى تالاپ ەتكەن ەدى. سونىمەن قاتار ول تۇرمەدە وتىرعان جىلدارى شاعىمدانۋ قۇقىعىنان دا ايىرىلعان بولاتىن. قىزىنىڭ سوزىنە سەنسەك، ونىڭ حاتتارى مەن شاعىمدارى تۇرمە قابىرعاسىنان ءارى اسپاعان.
بۇكىل الەم ونى اياۋسىز ازاپتاعانىن بىلەدى دەگەن قىزى، پرەزيدەنتتەن «شاڭىراق ءىسىن» قايتا قاراۋعا جىبەرۋدى جانە اكەسىن قايتىس بولعاننان كەيىن تولىق اقتاۋدى سۇرادى.
