الماتى وبلىسىنداعى كەگەن اۋدانىندا قازاقستان رەسپۋبليكاسىنىڭ مەملەكەتتىك رامىزدەرى كۇنى كەڭ كولەمدە اتالىپ ءوتىلدى.
اتاپ ايتار بولساق، مەرەكەلىك شارا اۋدان ورتالىعى كەگەن اۋىلىندا «مەنىڭ تۋىم-مەنىڭ ماقتانىشىم» اتتى كولىكتەر شەرۋىمەن باستالدى.
ەلىمىزدىڭ كوك بايراعىن قولىنا ۇستاپ، كولىكپەن جەلەۋلەتكەن ازاماتتار جالپى سانى 11 كولىكپەن شەرۋلەتىپ، ايماقتى دۇبىرگە بولەدى.
ارتىنشا، ورتالىق الاڭدا ءدۇيىم جۇرتتىڭ قاتىسۋىمەن ءبىر ۋاقىتتا مەملەكەتتىك ءانۇران ورىندالىپ، ارتى سالتاناتتى شاراعا ۇيىمداستىرىلدى.
شارادا اۋداندىق ءماسليحاتتىڭ توراعاسى الماسبەك نۇعمان اۋدان جۇرتشىلىعىن قۇتتىقتادى.
«رامىزدەر- تاۋەلسىز ەلدىڭ بويتۇمارى.
ۇلتتىق رۋحتىڭ ايبارى، ەگەمەن ەلدىڭ ايدارى، تاعىلىمدى تاريحتان سىر شەرتەر مەملەكەتتىڭ ايشىقتى تاڭباسى دا وسىلار. رامىزدەرگە دەگەن قۇرمەت – ازاماتتاردىڭ ەل بولاشاعىنا دەگەن سەنىمىنىڭ جانە پاتريوتتىق سەزىمدەرىنىڭ ولشەمى. تاۋەلسىزدىگىمىزدىڭ تۇمارىنا اينالعان مەملەكەتتىك رامىزدەرىمىز تۇعىرىنان تۇسپەسىن. كوك تۋىمىز كوكتە ماڭگى جەلبىرەي بەرسىن!»،-دەدى كەگەن اۋداندىق ءماسليحاتتىڭ توراعاسى الماسبەك نۇعمان.
مەرەكەنى تويلاۋعا ارنالعان شارا سوڭى، كونتسەرتكە ۇلاستى.
