بۇگىن قازاقستان پرەزيدەنتى قاسىم-جومارت توقاەۆ رەسمي ساپارمەن ماسكەۋگە باردى. بۇل قاسىم-جومارت توقاەۆتىڭ پرەزيدەنت رەتىندەگى شەت ەلگە جاساعان ەڭ العاشقى ساپارى. پرەزيدەنت مىنگەن ۇشاق "ۆنۋكوۆو-2" اۋەجايىنا ءبىزدىڭ ەل ۋاقىتىمەن 14.00-دە جەتتى. اۋەجايدا مەملەكەت باسشىسىن رەسەيدىڭ سىرتقى ىستەر ءمينيسترىنىڭ ورىنباسارى الەكساندر پانكين، رەسەي سىرتقى ىستەر مينيسترلىگى حاتتاما دەپارتامەنتىنىڭ باسشىسى يگور بوگداشەۆ پەن قازاقستاننىڭ رەسەيدەگى ەلشىسى يمانعالي تاسماعامبەتوۆ قارسى الدى.
الەۋمەتتىك جەلىدەگى جۇرت ءبىر ەلدىڭ باسشىسىن تەرەزەسى تەڭ ادام ەمەس، ءمينيستردىڭ ورىنباسارى قارسى العانىنا نارازى. ديپلوماتيا زاڭدىلىعىنا سۇيەنسەك، ءار قادامى ساناۋلى مۇنداي كەزدەسۋلەردىڭ ءاربىر ءساتى ولشەپ-ءپىشۋلى. سوندىقتان، نەشە رەت كىرپىك قاققانىنا دەيىن ساناپ وتىراتىن جۋرناليستەر قاۋىمى تۇگىلى، قاراپايىم جۇرتشىلىق تا قر ۋاقىتشا پرەزيدەنتىن رف پرەزيدەنتى كۇتىپ الماعانىنا اڭ-تاڭ.
بۇل جاعدايدان نەنى جورامالداۋعا بولادى؟
ءبىرىنشىسى، توقاەۆ ۋاقىتشا پرەزيدەنت بولعاندىقتان، قازاق ەلى باسشىسىن حاتتاما دەپارتامەنتىنىڭ باسشىسى كۇتىپ الا بەرسە دە بولادى دەگەن توقتامعا كەلۋى. ديپلوماتيالىق تىلدە بۇل بولا بەرەدى.
ەكىنشىسى، رف پرەزيدەنتىنىڭ ءالى دە توقاەۆپەن ساناسا قويمايتىندىعىن كورسەتەدى.
ءۇشىنشىسى، كرەمل قوجايىنىنىڭ ەلباسىعا دەگەن "وكپەسى" بارى انىق. وسىعان دەيىن دە ينتەرنەت بەتتەرىندە رەسەيدەگى بيلىك اۋىسسا، قازاقستان جولىمەن اۋىساتىنى بىرنەشە مارتە جازىلعان بولاتىن. نازارباەۆتىڭ جۇرگەن جولىن قايتالادى دەگەن بۇل ءپۋتيننىڭ ساياسي امبيتسياسىنا ارينە، جاقسى اتاق ەمەس. ونىڭ ۇستىنە ەلباسىمىزدىڭ ورتاق ۆاليۋتادان دا قۇرىق ءۇزىپ كەتكەنىن ەكونوميكالىق ساراپشىلار ايتا باستادى. سوڭعى كەزدە قازاقستان سولتۇستىك كورشىمىزگە قاراعاندا، باتىس پەن ەۋروپانىڭ قاباعىن كوپ باعىپ كەتتى. وسىنىڭ ءبارى جينالىپ كەلگەندە قر ۋاقىتشا پرەزيدەنتىن ماسكەۋ سالقىن قاباقپەن ءبىر ىقتىرىپ الماق نيەتىندەگى ساياسي قادام ەكەنىن باجايلاۋعا بولادى.
"ادىرنا" ۇلتتىق پورتالى
