Búgin Qazaqstan Prezıdenti Qasym-Jomart Toqaev resmı saparmen Máskeýge bardy. Bul Qasym-Jomart Toqaevtyń Prezıdent retindegi shet elge jasaǵan eń alǵashqy sapary. Prezıdent mingen ushaq "Vnýkovo-2" áýejaıyna bizdiń el ýaqytymen 14.00-de jetti. Áýejaıda memleket basshysyn Reseıdiń syrtqy ister mınıstriniń orynbasary Aleksandr Pankın, Reseı Syrtqy ister mınıstrligi hattama departamentiniń basshysy Igor Bogdashev pen Qazaqstannyń Reseıdegi elshisi Imanǵalı Tasmaǵambetov qarsy aldy.
Áleýmettik jelidegi jurt bir eldiń basshysyn terezesi teń adam emes, mınıstrdiń orynbasary qarsy alǵanyna narazy. Dıplomatııa zańdylyǵyna súıensek, ár qadamy sanaýly mundaı kezdesýlerdiń árbir sáti ólshep-pishýli. Sondyqtan, neshe ret kirpik qaqqanyna deıin sanap otyratyn jýrnalıster qaýymy túgili, qarapaıym jurtshylyq ta QR ýaqytsha Prezıdentin RF Prezıdenti kútip almaǵanyna ań-tań.
Bul jaǵdaıdan neni joramaldaýǵa bolady?
Birinshisi, Toqaev ýaqytsha Prezıdent bolǵandyqtan, Qazaq Eli basshysyn hattama departamentiniń basshysy kútip ala berse de bolady degen toqtamǵa kelýi. Dıplomatııalyq tilde bul bola beredi.
Ekinshisi, RF Prezıdentiniń áli de Toqaevpen sanasa qoımaıtyndyǵyn kórsetedi.
Úshinshisi, Kreml qojaıynynyń Elbasyǵa degen "ókpesi" bary anyq. Osyǵan deıin de ınternet betterinde Reseıdegi bılik aýyssa, Qazaqstan jolymen aýysatyny birneshe márte jazylǵan bolatyn. Nazarbaevtyń júrgen jolyn qaıtalady degen bul Pýtınniń saıası ambıııasyna árıne, jaqsy ataq emes. Onyń ústine Elbasymyzdyń ortaq valıýtadan da quryq úzip ketkenin ekonomıkalyq sarapshylar aıta bastady. Sońǵy kezde Qazaqstan soltústik kórshimizge qaraǵanda, Batys pen Eýropanyń qabaǵyn kóp baǵyp ketti. Osynyń bári jınalyp kelgende QR ýaqytsha Prezıdentin Máskeý salqyn qabaqpen bir yqtyryp almaq nıetindegi saıası qadam ekenin bajaılaýǵa bolady.
"Adyrna" ulttyq portaly
