بۇگىن – بۇقارالىق اقپارات قۇرالدارى قىزمەتكەرلەرى كۇنى

بۇگىن – بۇقارالىق اقپارات قۇرالدارى قىزمەتكەرلەرى كۇنى. بۇل مەرەكە 2019 جىلى ۇكىمەتتىڭ قاۋلىسىمەن بەكىتىلدى. بۇرىن تاۋەلسىز قازاقستاننىڭ جۋرناليستيكاسى كۇنى 10 مامىردا اتاپ ءوتىلدى. سەبەبى 1870 جىلى ءدال وسى كۇنى قازاق تىلىندەگى العاشقى باسىلىم - «تۇركىستان ءۋالاياتى» گازەتىنىڭ العاشقى سانى جارىق كورگەن ەدى. 1997 جىلى بۇل داتا وزگەرتىلىپ، جۋرناليستەردىڭ كاسىبي مەرەكەسى باق تۋرالى قازاقستاندىق العاشقى زاڭ شىققان كۇن 28 ماۋسىمعا بەلگىلەندى. 2011 جىلدىڭ قازانىندا تۇڭعىش پرەزيدەنت نۇرسۇلتان نازارباەۆ ەلىمىزدەگى كاسىبي جانە باسقا دا مەرەكەلەر ءتىزىمىنىڭ جاڭا رەداكتسياسىن ماقۇلدادى. وعان سايكەس، 28 ماۋسىم بايلانىس جانە اقپارات قۇرالدارى قىزمەتكەرلەرى كۇنى بولىپ بەكىتىلدى. ال 2019 جىلى پرەزيدەنت قاسىم-جومارت توقاەۆ ۇكىمەتكە قازاقستان جۋرناليستەرىنىڭ كاسىبي مەرەكەسىن بەكىتۋگە تاپسىرما بەردى. ءسويتىپ 28 ماۋسىم – بۇقارالىق اقپارات قۇرالدارى قىزمەتكەرلەرى كۇنى دەپ جاريالاندى. اقپارات جانە قوعامدىق دامۋ مينيسترلىگىنىڭ 2023 جىلى اقپان ايىندا بەرگەن مالىمەتتەرىنە سۇيەنسەك، ەلدە ەسەپكە قويىلعان 5 208 باق بار: مەرزىمدى باسپا باسىلىمى – 3 686, تەلەارنا – 191, راديو – 84, شەتەلدىك باق – 279 جانە ينتەرنەت باق – 968 (ونىڭ ىشىندە اقپارات اگەنتتىگى – 543, جەلىلىك باسىلىم – 425). بۇگىن مەملەكەت باسشىسى قاسىم-جومارت توقاەۆ بۇقارالىق اقپارات قۇرالدارى وكىلدەرىن كاسىبي مەرەكەسىمەن قۇتتىقتادى.

«ادىلەتتى قازاقستاندى قۇرۋ ءۇشىن قوعامدا قۇندىلىقتار جۇيەسىن جاڭعىرتىپ، ۇلتتىڭ جاڭا ساپاسىن قالىپتاستىرۋدىڭ ءمان-ماعىناسى زور. بۇل باعىتتا ەڭبەكقورلىق پەن بىلىمپازدىقتى، ادال ازاماتقا ءتان قاسيەتتەردى دارىپتەيتىن ماسس-مەديا وكىلدەرى ايرىقشا ءرول اتقارادى. بۇقارالىق اقپارات قۇرالدارى ازاماتتىق ديالوگ جۇرگىزۋدىڭ اشىق الاڭىنا اينالىپ، مەملەكەت پەن قوعامنىڭ ءوزارا بايلانىسىن نىعايتۋعا زور ۇلەس قوسىپ ءجۇر. ەلىمىزدىڭ جۋرناليستەرى وزىق وي مەن تىڭ يدەيالاردىڭ تارالۋىنا دانەكەر بولىپ، ازاماتتاردى تولعاندىراتىن وزەكتى ماسەلەلەردى كوتەرەدى. سونداي-اق وقيعالاردى جان-جاقتى زەردەلەپ، پوپۋليزم مەن ارانداتۋشىلىققا توسقاۋىل بولادى. بۇل – ايرىقشا ماڭىزدى ميسسيا. وسىنداي جاۋاپتى قىزمەتتە ءاردايىم ابىروي بيىگىنەن كورىنە بەرىڭىزدەر! بارشاڭىزعا زور دەنساۋلىق، باق-بەرەكە جانە شىعارماشىلىق تابىس تىلەيمىن!»—دەدى ول.

ايتا كەتەيىك، بيىل «دارا» پرەزيدەنت باستامالارىنىڭ قورى اتىنان مەملەكەتتىك باق-تا جۇمىس ىستەيتىن قىزمەتكەرلەرگە تەگىن پاتەرلەر تابىستالدى. ولاردىڭ اراسىندا جۋرناليستەر، رەجيسسەرلەر، مونتاجەرلار، وپەراتورلار جانە باسقا دا مامان يەلەرى بار.