Búgin – Buqaralyq aqparat quraldary qyzmetkerleri kúni. Bul mereke 2019 jyly Úkimettiń qaýlysymen bekitildi.
Buryn Táýelsiz Qazaqstannyń jýrnalıstıkasy kúni 10 mamyrda atap ótildi. Sebebi 1870 jyly dál osy kúni qazaq tilindegi alǵashqy basylym - «Túrkistan ýálaıaty» gazetiniń alǵashqy sany jaryq kórgen edi.
1997 jyly bul data ózgertilip, jýrnalısterdiń kásibı merekesi BAQ týraly qazaqstandyq alǵashqy zań shyqqan kún 28 maýsymǵa belgilendi.
2011 jyldyń qazanynda Tuńǵysh Prezıdent Nursultan Nazarbaev elimizdegi kásibı jáne basqa da merekeler tiziminiń jańa redakııasyn maquldady. Oǵan sáıkes, 28 maýsym Baılanys jáne aqparat quraldary qyzmetkerleri kúni bolyp bekitildi.
Al 2019 jyly prezıdent Qasym-Jomart Toqaev úkimetke Qazaqstan jýrnalısteriniń kásibı merekesin bekitýge tapsyrma berdi. Sóıtip 28 maýsym – Buqaralyq aqparat quraldary qyzmetkerleri kúni dep jarııalandy.
Aqparat jáne qoǵamdyq damý mınıstrliginiń 2023 jyly aqpan aıynda bergen málimetterine súıensek, elde esepke qoıylǵan 5 208 BAQ bar: merzimdi baspa basylymy – 3 686, telearna – 191, radıo – 84, sheteldik BAQ – 279 jáne ınternet BAQ – 968 (onyń ishinde aqparat agenttigi – 543, jelilik basylym – 425).
Búgin Memleket basshysy Qasym-Jomart Toqaev buqaralyq aqparat quraldary ókilderin kásibı merekesimen quttyqtady.
«Ádiletti Qazaqstandy qurý úshin qoǵamda qundylyqtar júıesin jańǵyrtyp, ulttyń jańa sapasyn qalyptastyrýdyń mán-maǵynasy zor. Bul baǵytta eńbekqorlyq pen bilimpazdyqty, adal azamatqa tán qasıetterdi dáripteıtin mass-medıa ókilderi aıryqsha ról atqarady.
Buqaralyq aqparat quraldary azamattyq dıalog júrgizýdiń ashyq alańyna aınalyp, memleket pen qoǵamnyń ózara baılanysyn nyǵaıtýǵa zor úles qosyp júr. Elimizdiń jýrnalısteri ozyq oı men tyń ıdeıalardyń taralýyna dáneker bolyp, azamattardy tolǵandyratyn ózekti máselelerdi kóteredi. Sondaı-aq oqıǵalardy jan-jaqty zerdelep, popýlızm men arandatýshylyqqa tosqaýyl bolady. Bul – aıryqsha mańyzdy mıssııa.
Osyndaı jaýapty qyzmette árdaıym abyroı bıiginen kórine berińizder! Barshańyzǵa zor densaýlyq, baq-bereke jáne shyǵarmashylyq tabys tileımin!»—dedi ol.
Aıta keteıik, bıyl «Dara» prezıdent bastamalarynyń qory atynan memlekettik BAQ-ta jumys isteıtin qyzmetkerlerge tegin páterler tabystaldy. Olardyń arasynda jýrnalıster, rejısserler, montajerlar, operatorlar jáne basqa da maman ıeleri bar.
