ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىنىڭ ستۋدەنتتەرى جوو-نىڭ 70 جىلدىعىنا وراي "70 يگى ءىس" اكتسياسىن وتكىزۋدە.
"جاس وردا" جاستار قاۋىمداستىعىنىڭ بەلسەندىلەرى وسىعان دەيىن دە بىرنەشە يگى ءىس جاساعان. ماسەلەن، "مەكتەپكە جول" اكتسياسىن قولداي وتىرىپ، مۇقتاج وتباسىلاردان شىققان بالالارعا مەكتەپ كيىمدەرى مەن كەڭسە كەرەك-جاراقتارىنىڭ 160 جيىنتىعىن ساتىپ الۋعا كومەكتەستى. ستۋدەنتتىك ۇيىمدا ەكى ماڭىزدى باعىت بار – جوو-دا 18 جىلدان استام جۇمىس ىستەپ كەلە جاتقان "اقنيەت" قايىرىمدىلىق بىرلەستىگى جانە 2019 جىلى قۇرىلعان ەرىكتىلەر شتابى.
– ءبىزدىڭ ۋنيۆەرسيتەتتە ستۋدەنتتەر جۇيەلى نەگىزدە ەرىكتىلىكپەن اينالىسادى، – دەيدى ۋنيۆەرسيتەتتىڭ جاستار ساياساتى دەپارتامەنتىنىڭ ديرەكتورى رۋستام بۋزياكوۆ. – جاسوردالىقتار بالالار ۇيلەرى مەن قارتتار ۇيلەرىنە، از قامتىلعان وتباسىلار مەن ارداگەرلەرگە ءاردايىم بارىپ تۇرادى. بۇل رەتتە ەش شارا سىيلىقتارسىز نەمەسە ازىق-تۇلىك جيىنتىقتارىنسىز، سونداي-اق ستۋدەنتتەردىڭ ورىنداۋىنداعى كونتسەرتتىك نومىرلەرسىز اياقتالمايدى. ءبىزدىڭ ستۋدەنتتەر قامقورلىعىنداعى ءار بالانى اتالار مەن اجەلەردى جاقسى بىلەدى. ال ولار ءوز تاراپىنان جاڭالىقتارمەن ءبولىسۋ جانە جاعىمدى اسەرلەرىمەن قۋانتۋ ءۇشىن جاستاردىڭ كەلۋىن اسىعا كۇتەدى.
سونداي-اق ستۋدەنتتەر اۋىر ناۋقاستاردى قولداۋ ءۇشىن بىرقاتار قايىرىمدىلىق اكتسيالارىن وتكىزدى. قاراجات جيناۋ ءۇشىن فۋتبول، ۆولەيبول تۋرنيرلەرى، جارمەڭكەلەر مەن كونتسەرتتەر،
سونداي-اق قان تاپسىرۋ اكتسيالارى ۇيىمداستىرىلدى.
بەلسەندىلەر ەكولوگيالىق ۆولونتەرلىككە كوپ كوڭىل بولەدى: بۇقپا وزەنىنىڭ ارناسىن، ساياباقتار مەن گۇلزارلاردى تازالاپ، قالانىڭ جالعىزباستى قارت تۇرعىندارىنىڭ اۋلالارىن قوقىس پەن قاردان تازارتتى.
ۋنيۆەرسيتەت ستۋدەنتتەرىنىڭ، وقىتۋشىلارىنىڭ جانە تۇلەكتەرىنىڭ جالپى كۇش-جىگەرىنىڭ ارقاسىندا جاڭا جىل قارساڭىندا 300-دەن استام بالانىڭ تىلەكتەرى ورىندالدى.
سونىمەن قاتار، ستۋدەنتتەر ءبىزدىڭ ەلدە دە، ودان تىس جەرلەردە دە بولعان توتەنشە وقيعالاردان تىس قالمادى. تۇركيا ازاماتتارىنا، قوستاناي جانە ەكىباستۇز تۇرعىندارىنا ءورت جانە تابيعي اپاتتار سالدارىنان زارداپ شەككەندەرگە كيىم، ازىق-تۇلىك، ءدارى-دارمەك جانە جەكە گيگيەنا قۇرالدارىن جيناۋدى ۇيىمداستىردى.
