مەملەكەت باسشىسى قاسىم-جومارت توقاەۆ «قازمۇنايگاز» ۇلتتىق كومپانياسىنىڭ باسقارما توراعاسى ماعزۇم مىرزاعاليەۆتى قابىلدادى، - دەپ حابارلايدى "ادىرنا" ءتىلشىسى اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى كومپانيانىڭ 2023 جىلدىڭ ءبىرىنشى جارتى جىلدىعىنداعى وپەراتسيالىق جانە قارجىلىق قىزمەتىنىڭ قورىتىندىلارى تۋرالى ەسەبىن تىڭدادى. مەملەكەت باسشىسىنا «قازمۇنايگاز» وتكەن جىلدىڭ سايكەس كەزەڭىمەن سالىستىرعاندا بارلىق نەگىزگى كورسەتكىشتەر بويىنشا وسىمگە قول جەتكىزگەنى تۋرالى حابارلاندى.
ماعزۇم مىرزاعاليەۆ ءىرى ينۆەستيتسيالىق جوبالاردىڭ ىسكە اسىرىلۋ بارىسى تۋرالى، اتاپ ايتقاندا، اتىراۋ وبلىسىندا قۋاتتىلىعى جىلىنا 1 250 مىڭ توننا پوليەتيلەن زاۋىتىنىڭ جانە ماڭعىستاۋ وبلىسىنىڭ جاڭاوزەن قالاسىندا جاڭارتىلاتىن ەنەرگيا كوزدەرىن پايدالاناتىن گيبريدتى ەلەكتر ستانتسياسىنىڭ قۇرىلىسى تۋرالى باياندادى.
پرەزيدەنتكە مۇناي وڭدەۋ زاۋىتتارىنىڭ جۇمىسى، ءوندىرىس قارقىنى مەن جانار-جاعارماي قورىن قالىپتاستىرۋ تۋرالى اقپارات بەرىلدى. اتاپ ايتقاندا، «قازمۇنايگاز» فرانتسۋزدىق Air Liquide كومپانياسىمەن بىرلەسىپ، پاۆلودار مۇناي-حيميا زاۋىتىندا قىسقى ديزەل وتىنىن 160 مىڭ تونناعا دەيىن وندىرۋگە مۇمكىندىك بەرەتىن جوبانى جۇزەگە اسىرماق.
قورىتىندىلاي كەلە، قاسىم-جومارت توقاەۆ گەولوگيالىق بارلاۋ جۇمىستارىن دامىتۋ جانە پەرسپەكتيۆالىق بارلاۋ ۋچاسكەلەرىن زەرتتەۋگە ءىرى ينۆەستورلاردى تارتۋ بويىنشا بىرقاتار تاپسىرمالار بەردى.
ۇقساس جاڭالىقتار
