"وزەنمۇنايگاز" اق باس ديرەكتورىنىڭ بۇرىنعى ورىنباسارى ە. قارامىرزاەۆ (قازىرگى تاڭدا "قاراجانباسمۇناي" اق باس ديرەكتورىنىڭ ورىنباسارى) ۇستالدى، - دەپ حابارلايدى "ادىرنا" ءتىلشىسى قارجى مونيتورينگ اگەنتتىگىنىڭ ءباسپاسوز قىزمەتىنە سىلتەمە جاساپ.
"ە. قارامىرزاەۆ "كەزبي" جشس-ءنىڭ جانە "وزەنمۇنايگاز" اق-نىڭ باسقا دا مەردىگەر ۇيىمدارىنىڭ زاڭدى كاسىپكەرلىك قىزمەتىنە كەدەرگى جاساۋ ماقساتىندا ءوزىنىڭ قىزمەتتىك وكىلەتىن پايدالانعان دەپ كۇدىككە ىلىنگەن.
قارامىرزاەۆ كونكۋرستىڭ جەكەلەگەن قاتىسۋشىلارىنىڭ بىلىكتىلىك تالاپتارىنا سايكەس كەلمەيتىنىن جانە مۇناي-گاز سالاسىنداعى جۇمىس تاجىريبەسى تۋرالى جالعان قۇجاتتار ۇسىنعانىن بىلە تۇرا، ولاردى تەندەرگە قاتىستىرعان. ولاردىڭ مۇددەلەرىن قولداۋدى جالعاستىرا وتىرىپ، ول "كەزبي" جشس-ءنى كومپانياسى ءۇشىن ۇڭعىمالاردى جەراستى جوندەۋ بويىنشا كورىنەۋ قولايسىز شارت جاساسۋعا ءماجبۇر ەتتى", - دەلىنگەن حابارلامادا.
قما مالىمەتىنشە، ول زاڭسىز ارەكەتتەرىمەن "كەزبي" جشس-ءنىڭ زاڭدى مۇددەلەرىنە ەلەۋلى زيان كەلتىرگەن جانە مىڭنان اسا قىزمەتكەردىڭ قۇقىعىن بۇزىپ، سونداي-اق مەردىگەر ۇيىمداردىڭ ەڭبەك ۇجىمدارىندا الەۋمەتتىك شيەلەنىس تۋدىرعان.
قر قپك 201-بابىنىڭ نەگىزىندە وزگە اقپارات جاريالانبايدى.
"قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى", - دەلىنگەن حابارلامادا.
