عۇمار سەرعازين اتوم ەنەرگياسى جونىندەگى اگەنتتىك توراعاسىنىڭ ورىنباسارى قىزمەتىنەن كەتتى. بۇل تۋرالى بۇگىن، 1 قازاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ وكىمىمەن عۇمار ەكپىنۇلى سەرعازين قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى توراعاسىنىڭ ورىنباسارى لاۋازىمىنان بوساتىلدى»،– دەلىنگەن حابارلامادا.
عۇمار سەرعازين بۇل لاۋازىمعا 2025 جىلدىڭ 28 ساۋىرىندە تاعايىندالعان ەدى.
عۇمار ەكپىنۇلى 1986 جىلى قوستاناي وبلىسىنىڭ جىتىقارا قالاسىندا دۇنيەگە كەلگەن. 2008 جىلى «قازاق-امەريكا ۋنيۆەرسيتەتىن» زاڭگەر ماماندىعى بويىنشا ءبىتىرىپ، 2013 جىلى «قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا» مەملەكەتتىك جانە جەرگىلىكتى باسقارۋ ماگيسترى دارەجەسىن العان. 2015 جىلى اۆسترياداعى «اتوم ەنەرگياسى جونىندەگى حالىقارالىق اگەنتتىكتىڭ يادرولىق قۇقىق ينستيتۋتىندا» وقىعان. ال 2020 جىلى «احمەت بايتۇرسىنۇلى اتىنداعى قوستاناي مەملەكەتتىك ينستيتۋتىن» ەلەكتر ەنەرگەتيكاسى ماماندىعى بويىنشا تامامداعان.
ەڭبەك جولىن 2008 جىلى «استانا قالاسى سارىارقا اۋدانىنىڭ حالىققا قىزمەت كورسەتۋ ورتالىعىندا» باستاپ، 2011 جىلعا دەيىن ينسپەكتور، كەڭەسشى، باس ينسپەكتور جانە وپەراتسيالىق زال باستىعىنىڭ ورىنباسارى بولعان.
2011 جىلى «بتا بانك» اق زاڭ دەپارتامەنتىنىڭ كورپوراتيۆتىك بيزنەستى قۇقىقتىق قامتاماسىز ەتۋ باسقارماسىندا نەسيە جوبالارىن قۇقىقتىق سۇيەمەلدەۋ ءبولىمىنىڭ زاڭگەرى، زاڭ سەكتورىنىڭ مەڭگەرۋشىسى بولىپ جۇمىس ىستەگەن.
2011–2012 جىلدارى «قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ» تۇرعىن ءۇي قاتىناستارى باسقارماسىندا ساراپشى، باس ساراپشى، ال 2013–2014 جىلدارى «وڭىرلىك دامۋ مينيسترلىگىنىڭ» وسى باعىتتاعى باسقارماسىندا باس ساراپشى قىزمەتىن اتقارعان.
ەنەرگەتيكا سالاسىنداعى قىزمەتى 2014 جىلى باستالعان. سول جىلى «يندۋستريا جانە جاڭا تەحنولوگيالار مينيسترلىگىنىڭ مەملەكەتتىك ەنەرگەتيكالىق قاداعالاۋ جانە باقىلاۋ كوميتەتىندە» ىشكى اكىمشىلەندىرۋ باسقارماسىن، كەيىن زاڭ باسقارماسىن باسقارعان.
2014–2016 جىلدارى «ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ» زاڭ باسقارماسىنا جەتەكشىلىك ەتكەن.
2016–2017 جىلدارى «ەنەرگەتيكا مينيسترلىگىنىڭ» اقپاراتتىق تەحنولوگيالار جانە مەملەكەتتىك كورسەتىلەتىن قىزمەتتەر دەپارتامەنتى ديرەكتورىنىڭ ورىنباسارى بولعان.
2017 جىلعى قاڭتاردان 2023 جىلعا دەيىن «اتومدىق جانە ەنەرگەتيكالىق قاداعالاۋ مەن باقىلاۋ كوميتەتى» توراعاسىنىڭ ورىنباسارى قىزمەتىن اتقارعان. اگەنتتىككە اۋىسقانعا دەيىن، 2023 جىلعى ناۋرىزدان 2025 جىلعى 28 ساۋىرگە دەيىن «ەنەرگەتيكا مينيسترلىگىنىڭ» اتوم ەنەرگەتيكاسى جانە ونەركاسىبى دەپارتامەنتىن باسقارعان.
