ۇلى وتان سوعىسىنداعى جەڭىستىڭ 80 جىلدىعىنا وراي العاشقى مەرەكەلىك شارالار ۇلىتاۋ ايماعىندا تاڭەرتەڭ ەرتە باستالدى. ءىس-شارا ۇلى وتان سوعىسى باتىرلارىنا ارنالعان ەسكەرتكىشتەرگە گۇل شوقتارىن قويۋ راسىمىمەن اشىلدى.
حالقىمىزدىڭ حح عاسىردا باسىنان وتكەرگەن ەڭ اۋىر كەزەڭدەرىنىڭ ءبىرى — ەكىنشى دۇنيەجۇزىلىك سوعىس. تاريحي دەرەكتەرگە سۇيەنسەك، قان مايدانعا 1,2 ميلليون قازاقستاندىق اتتانىپ، ونىڭ 600 مىڭى ەلگە ورالماعان. بۇگىن — ءفاشيزمدى جەڭىپ، ادامزاتتى زۇلماتتان قۇتقارعان ۇلى جەڭىستىڭ 80 جىلدىعى. بۇل ايتۋلى داتا ەلىمىزدىڭ تۇكپىر-تۇكپىرىندە كەڭىنەن اتالىپ وتۋدە.
اتاپ ايتقاندا، جەزقازعان قالاسىنداعى «داڭق» اللەياسىندا «ۇلى جەڭىس – ۇرپاققا امانات» اتتى سالتاناتتى ءىس-شارا ءوتتى. جينالعان جۇرتشىلىق الدىمەن قازاقستان رەسپۋبليكاسىنىڭ مەملەكەتتىك گيمنىن ورىندادى. بۇدان كەيىن قاتىسۋشىلار سوعىستا قازا تاپقانداردى ءبىر مينۋت ۇنسىزدىكپەن ەسكە الىپ، ماڭگىلىك الاۋعا گۇل شوقتارىن قويدى. وبلىس اكىمى داستان رىسپەكوۆ پەن زيالى قاۋىم وكىلدەرى وتان ءۇشىن جانىن قيعان بوزداقتار رۋحىنا تاعزىم ەتتى.
داستان رىسپەكوۆ ارداگەرلەردى مەرەكەمەن قۇتتىقتاپ، ەڭبەك مايدانىندا كورسەتكەن ەرلىگى ءۇشىن العىس ءبىلدىردى.
مەموريال اۋماعىندا مايدان دالاسىنداعى جاۋىنگەرلەردىڭ ءومىرىن بەينەلەيتىن تەاترلاندىرىلعان كورىنىس كورسەتىلىپ، دالا اسحاناسى ۇيىمداستىرىلدى.
ءىس-شارا كەشكى ساعات 19:00-دە الاش الاڭىندا وتەتىن مەرەكەلىك كونتسەرتتىك باعدارلامامەن جالعاسپاق.
ەسكە سالايىق، ۇلىتاۋ وڭىرىنەن 16 مىڭعا جۋىق ازامات مايدانعا اتتانىپ، ونىڭ 10 مىڭنان استامى ەلگە ورالماعان. قازىرگى تاڭدا وڭىردەگى 397 تىل ەڭبەككەرىنە ۇلى جەڭىستىڭ 80 جىلدىعىنا ارنالعان مەرەيتويلىق مەدال تابىستالدى.
