قر دەنساۋلىق ساقتاۋ ءمينيسترى ەلجان ءبىرتانوۆ مىرزاعا!
شىمكەنتتەگى «جۇقپالى اۋرۋلار اۋرۋحاناسىندا» دارىگەرلەردىڭ قولىمەن جاسالعان وقىس جاعداي
قۇرمەتتى، مينيستر ە.ءبىرتانوۆ مىرزا!
ءبىز سىزگە تومەندە اتالعان شىمكەنت قالاسى، «جۇقپالى اۋرۋلار اۋرۋحاناسىندا» ورىن العان ادامنىڭ اقىلىنا سىيمايتىن وقىس جاعدايدىڭ ورىن الۋى بويىنشا باياندايمىز. مەديتسينانىڭ اتاسى اتانعان ەجەلگى گرەك دارىگەرى، كونە مەديتسينا رەفورماتورى گيپپوكرات (Ἱπποκράτης) بىلاي دەگەن ەكەن: «ءوزىنىڭ ونەرىن زۇلىمدىقتىڭ ونەرىنە اينالدىراتىن ادامدار دا بولادى نەمەسە قارسى جاعدايداعى ەمدەۋ ءىسى قارسى ناتيجەگە ۇرىندىرادى» - دەگەن ەكەن. ءوزىڭىز بىلەتىندەي، گيپپوكرات انتىن قابىلدايتىن ءاربىر دارىگەر ادامزاتتىڭ بالاسىنا، حالىققا، ەلىنە، ازاماتتار مەن بالالاردىڭ دەنساۋلىعى سىرقاتتانعاندا ادال قىزمەت ەتۋگە، مەملەكەتكە دە ادال جۇمىس جاساۋعا انت بەرەدى. ولاردىڭ بارلىعى دا سول قىزمەتى ءۇشىن ءبىز بەن ءسىز مەملەكەتكە تولەگەن سالىقتان وزدەرىنە تيەسىلى جالاقى الىپ وتىر.
مەنىڭ سىزگە ارنايى حات جازۋىما تومەندەگىدەي وقىس جاعداي سەبەپ بولدى. 25.03.2019 كۇنى مەنىڭ تۋعان باۋىرىم ەربولات سامەنوۆتىڭ كىشى ۇلى نۇريسلام تاسپولات سىرقاتتانىپ جەدەل جاردەم ارقىلى شىمكەنت قالالىق «جۇقپالى اۋرۋلار اۋرۋحاناسىنا» تۇسكەن بولاتىن. دەنساۋلىعى قاۋىپتى جاعدايدا بولعان جوق، ازداپ قۇسىپ، مازاسىزدانعان ەدى. ارادا از ۋاقىت وتكەننەن كەيىن اۋرۋحانادا جاتقان بالانىڭ دەنساۋلىعى قالىپتى جاعدايعا كەلدى. ازداپ قانا تەمپەراتۋراسى كوتەرىلدى. كەيىننەن تەمپەراتۋراسى دا قالپىنا كەلدى. قاۋىپتەنەتىن ەشقانداي دا جاعداي بولعان جوق. ءۇش كۇن وتكەننەن كەيىن، ياعني، 28.03.2019 كۇنى بالاعا ۇلكەن دارەتىن شىعارۋ بويىنشا ساعات 15:30 دا كليزما جاسالدى. نۇريسلامعا كليزما جاسالعاندا جانىندا اناسى اراينۇر قالماقان ءوزى بولعان. ادامنىڭ ويىنا كەلمەيتىن ماسقارانىڭ بارلىعى وسى كەزدە ورىن الدى. سوندا الگى دارىگەرلەر بالامىز نۇريسلامعا قايناعان سۋمەن كليزما جاساپ، اۋىر جاراقاتقا تاپ قىلدى. بالا شىرقىراپ جىلاعاندا اناسى اراينۇردىڭ اياعىنا قايناعا سۋ ءتيىپ كەتەدى. بالانىڭ قۇيرىعىن كۇيىك شالعان. قايناعان سۋ ىشكە قاراي ءوتىپ كەتكەن. ۇلكەن دارەتى شىقپاي، ءالى شىرقىراپ جىلاپ جاتىر. ونىڭ ورنىنا قان شىعىپ جاتىر. ءبىز ونىڭ بارلىعىن بەينەجازبا مەن فوتوعا ءتۇسىرىپ قويعانبىز. دەرەك رەتىندە، دالەل رەتىندە قولىمىزدا تۇر. كىشكەنتاي نارەستەگە قايناعان سۋمەن جاسالعان كليزمادان كەيىن ونىڭ دەنساۋلىعى قايدان وڭسىن؟ بالامىز سوڭعى كەزدە قاتتى مازاسىندانىپ كەتتى. جاعدايى بۇرىنعىداي ەمەس. اتا-اناسى شىر-پىر بولىپ جۇگىرىپ ءجۇر. بىزگە دە اۋىر ءتيىپ وتىر. ءبىلىمى مەن بىلىگى بار قانداي دارىگەر وسىنداي باسسىزدىققا بارادى؟ وسى جاعدايعا كوز جۇما قاراۋ مۇمكىن بە؟ كوز جۇما قارايدى دەپ ويلاماسىن. جاسى بىرگە ەندى كەلگەن نارەستەنى وسىنشاما قورلاعانى قالاي؟ سول ادامداردىڭ وزدەرى قورلانىپ قالاتىنىمەن جۇمىستارى جوق پا، الدە ولاردا بالا جوق پا؟ ديپلومنىڭ ءبارىن اقشامەن ساتىپ الىپ، جۇمىس جاساعاننىڭ جەمىسى وسى شىعار. ءبىز ەلىمىزدى الەمنىڭ دامىعان، باسەكەگە قابىلەتتى 30 ەلىنىڭ قاتارىنا قوسامىز دەپ جاتىرمىز. سوندا وسىنداي ماماندار ارقىلى قالاي وركەنيەتتى ەل بولماقپىز؟! سوندا بۇل «جۇقپالى اۋرۋلار اۋرۋحاناسىندا» بالالاردى ەمدەيتىن ەمەس، جاراقاتتايتىن، ومىرىنە قاۋىپ توندىرەتىن ءبىلىمسىز، بىلىكسىز دارىگەرلەر جۇمىس جاساپ وتىرعانى ايدان انىق دۇنيە.
بالاعا كليزما جاسالعاندا بولمەدە مىناۋ دارىگەرلەر بولعان:
ءبولىم مەڭگەرۋشىسى: جابىكەنوۆا گۇلجان دانيارقىزى
ورىنباسارى: اعاباەۆ مارات الماحانبەتۇلى
مەدبيكە: بايساقالوۆا ءاليا شالداربەكقىزى
سونىمەن قاتار، نۇريسلامدى وزگە ورىنعا جىبەرەمىز دەگەن دە سىبىستار شىعا كەلدى. سوندا بۇل جاۋاپكەرشىلىكتەن قاشۋ ما؟ بۇل جاعدايدى جاساعان دارىگەرلەردەن مىندەتتى تۇردە جاۋاپ الىنادى. ەشقاشان دا جاۋاپتان قۇتىلا المايدى. ءبىز شىمكەنت قالاسى، ەڭبەكشى اۋداندىق ىشكى ىستەر باسقارماسىنا ارىز تۇسىردىك. ەشقانداي دا جاۋاپ كەلگەن جوق ءالى دە. ءبىر ايدان كەيىن دەپتى. ءبىز ەشقاشان دا ءبىر اي بويى كۇتپەيمىز. وسى جاعدايدى ءوزىڭىز باقىلاۋىڭىزعا الىڭىز دەپ الەۋمەتتىك جەلىدە «قر دەنساۋلىق ساقتاۋ مينيسترلىگىنىڭ» سايتىنا ارنايى شىعارىپ وتىرمىز. ءبىز سىزدەن:
1. نۇريسلامدى ەلورداداعى «انا مەن بالا» ورتالىعىنا ارنايى كۆوتامەن الدىرىپ، ەم-دومىنا، دەنساۋلىعىنا قاجەتتى شارالاردى جاساۋعا كومەك بەرۋىڭىزدى سۇرايمىز. سەبەبى، ءبىز اتالعان اۋرۋحاناداعى قىزمەتكەرلەرگە وتە سەنىمسىزدىك ءبىلدىرىپ وتىرمىز. بالامىزدىڭ دەنساۋلىعىنا تاعى دا ءبىر زيان كەلەدى دەگەن بىزدە قورقىنىش بار;
2. شىمكەنت قالاسى، «جۇقپالى اۋرۋلار اۋرۋحاناسىندا» ورىن العان جاعدايعا بايلانىستى بالاعا كليزما جاساعان دارىگەردى، ءبولىم مەڭگەرۋشىسىن، سوندا بولعان قىزمەتكەرلەردىڭ بارىنە قىزمەتتىك تەكسەرىس جاساۋىڭىزدى، ولاردى قاتاڭ جاۋاپكەرشىلىككە تارتۋىڭىزدى سۇرايمىز;
3. وسى وقىس جاعدايعا بايلانىستى، بىلىكسىز، ءبىلىمسىز، ادام دەنساۋلىعىنا نەمقۇرايلى قارايتىن دارىگەرلەردىڭ مەديتسينانىڭ جاۋاپتى ورىنداردا جۇمىس جاساماۋىنا قاتاڭ ەسكەرتۋلەر جاساۋىڭىزدى سۇرايمىز;
سەبەبى، ءدال وسىنداي وقىس جاعدايلاردىڭ قانشاماسى كوزدەن تاسا، جاسىرىن كۇيىندە قالۋدا. قانشاما اتا-انانىڭ زارى ىشىندە. مەن ونىڭ دەنساۋلىق ساقتاۋ ورىندارىندا سانى قانشا ەكەنىن بىلمەسەم دە، بار ەكەنىن بىلەمىن. كەلەسى جولى دا نارەستەلەردىڭ شىرقىراپ قالماۋى ءۇشىن، انالاردىڭ بوزداپ قالماۋى ءۇشىن وسى جاعدايدى سىزگە ارنايى جەتكىزىپ، حاباردار ەتىپ، الداعى ۋاقىتتا قايتالانبايتىنىنا سەنىم بىلدىرەمىن. وسى وقىس جاعدايدى نازارعا الىپ، جان-جاقتى مەديتسينالىق ساراپتاما جاساپ، قولىمەن ىستەگەنىن موينىمەن كوتەۋگە ءتيىستى دارىگەرلەردى قاتاڭ جاۋاپقا تارتاۋىڭىزدى سۇرايمىز.
مەملەكەت ءۇشىن دە، ادام ءۇشىن دە ەڭ باعالى بايلىق – ادامنىڭ ءومىرى مەن دەنساۋلىعى، بالالاردىڭ اماندىعى. بۇل قر «اتا زاڭىندا» ارنايى باپپەن كورسەتىلگەن. سول سەبەپتى وسىنداي بىلىكسىز، ءبىلىمسىز، كەلەشەك ۇرپاقتىڭ دەنساۋلىعىنا زيان جاسايتىن دارىگەرلەردىڭ اۋرۋحانالاردا جۇمىس جاساۋعا ەشقانداي دا حاقىسى جوق. بۇعان ەل دە قارسى. بىزگە كەرەگى بالامىزدىڭ دەنساۋلىعى. ونىڭ ءومىرى مەن كەلەشەگى. بالامىزدىڭ دەنساۋلىعى رەتكە كەلمەي، قولىمەن جاساعاندارىن باسىمەن كوتەرمەي، ءبىز بۇل ءىستى اياقسىز قالدىرمايمىز. ءبىز تەرگەپ، تەكسەرەتىن پروكۋراتۋرا، سوت، قۇزىرلى ورگاندار ارقىلى جۇمىس جاسايمىز.
بەكبولات قارجان
