ەلىمىزدەگى ءتۋريزمدى دامىتۋعا بولىنگەن قاراجات "قازاقستان ارۋى-2019" بايقاۋىن وتكىزۋگە جۇمسالعان. وندا دا باقانداي 73 ميلليون تەڭگەدەن استام قارجى كونكۋرسقا قاتىساتىن ارۋلاردى ىرىكتەپ الۋعا عانا كەتكەن. مۇنداي قىزىق دەرەك قازىنا قارجىسىنىڭ قالاي جۇمسالىپ جاتقانى باقىلايتىن ەسەپ كوميتەتىنىڭ وتىرىسىندا ايتىلدى.
قازاقستاندا ءتۋريزمدى دامىتۋعا بولىنگەن 73 ميلليون تەڭگە «قازاقستان ارۋى-2019» بايقاۋىن وتكىزۋگە جۇمسالعان.
وسىلايشا، حالىقتىڭ سالىعىنان تۇسكەن قارجىنى قۇزىرلى ورگان وكىلدەرى وزىمبىلەرمەندىككە سالىپ، ماقساتسىز جۇمساپتى. دەگەنمەن، ولار كەتكەن قارجىنى قازاقتىڭ سۇلۋ قىزدارىن كورۋ ءۇشىن كەلەتىن قىتايلىق جانە ۇندىستاندىق تۋريستەردىڭ ەسەبىنەن قايتارىپ الامىز دەپ اقتالعان، دەپ حابارلايدى "ەۋرازيا ءبىرىنشى ارناسى".
بيىل وتەتىن وسى بايقاۋدىڭ تەك ىرىكتەۋ كەزەڭىنە عانا قازىنادان 73 ميلليون 200 مىڭ تەڭگە قارجى جۇمسالىپ وتىر. بۇل تەك باستاپقى شىعىن. ارى قاراي تاعى قانشا قاراجات قاجەت ەكەنىن ءدوپ باسىپ ايتۋ قيىن، ازىرگە. ال، جوسپار بويىنشا بۇل اقشا ەلىمىزگە تۋريستەر تارتۋ ماقساتىندا ۇيىمداستىرىلاتىن 5 ينۆەستيتسيالىق فورۋم مەن وسىنشا مەموراندۋم بەكىتۋگە كەتۋى ءتيىس بولعان.
«بۇل تۋريزم يندۋسترياسى كوميتەتىنىڭ قاراجاتتى دۇرىس جوسپارلاماۋىنان تۋىنداپ وتىرعان ماسەلە. ەلدىڭ تۋريستىك الەۋەتىن ارتتىرۋ ءۇشىن شەتەلدىك جانە وتاندىق ينۆەستورلار، بارلىعى 250 ادام قاتىسۋى ءتيىس فورۋمدار وتپەگەن. ونىڭ ورنىنا تۋريزمگە تۇك قاتىسى جوق "قازاقستان ارۋى " بايقاۋىنىڭ ىرىكتەۋىن ۇيىمداستىرىلعان»، - دەيدى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسى باقىت جاقان.
ال مادەنيەت جانە سپورت ۆيتسە-ءمينيسترى سۇلۋلىق بايقاۋىنىڭ تۋريزمگە تىكەلەي قاتىسى بار دەيدى. ءتىپتى، شەتەلدىك ازاماتتار "قازاقتىڭ حاس سۇلۋلارىن كورىپ، تاڭداي قاققانىندا تۇرعان نە بار؟" - دەپ جاۋاپ بەردى.
«ءبىز تۋريستىك بيزنەستى زەرتتەي كەلە، بۇل بايقاۋدىڭ وسى سالاعا تىكەلەي قاتىسى بار ەكەنىن انىقتادىق. وسىلايشا، بۇگىندە قىتايلىق جانە ۇندىلىك تۋريستەر وسى بايقاۋدى اسىعا كۇتەتىنە كوز جەتكىزدىك. سەبەبى، ولاردىڭ كوبىسى وسى ارۋلار سايىسىن عالامتور جانە تەلەديدار ارقىلى تاماشالايدى ەكەن. كەلىپ كورگىسى كەلەتىندەرى دە كوپ. وتكەن جىلى وتكەن «قازاقستان ارۋىندا» قىتاي مەن ءۇندىستاننان 400 ادام كەلگەن. قازاق قىزدارىنىڭ سۇلۋلىعىمەن شەتەلدىكتەردىڭ تامسانۋىن دۇرىس دەپ ەسەپتەيمىن»، - دەيدى قر مادەنيەت جانە سپورت ءمينيسترىنىڭ ورىنباسارى ەرلان قوجاعاپانوۆ.
ال قوعام بەلسەندىلەرى بۇنداي سايىستار قازاق قوعامىنا قونىمسىز دۇنيە ەكەنىن ايتادى. ءتىپتى، بۇعان مەملەكەت تاراپىنان قارجى جۇمسالۋىنىڭ ءوزى دۇرىس ەمەس دەيدى.
«بىردەن-ءبىر نەگىزگى ەڭ ءبىر وڭتايلى جولى بۇل "قازاقستان ارۋى" بايقاۋىن وتكىزۋ ەمەس. وعان كەلەتىن تۋريستەردىڭ دە سانى اسا كوپ بولادى دەپ سەنۋگە بولمايدى. ءجاي ءبىر سونداي جەڭىل ويلى ادامدار قىزىقتاۋى مۇمكىن. ول بۇكىل الەمنىڭ قانشا پايىزى ەكەنىن قازىر ايتۋ قيىن. دەگەنمەن كوپ ادام ونى قىزىق كورمەيدى»، - دەيدى قوعام بەلسەندىسى قۋاندىق شاماقايۇلى.
ال قوعام قايراتكەرلەرى وسىنداي مادەني شارالارعا ينۆەستورلاردى جۇمىلدىرۋ قاجەتتىگىن ايتادى. مەملەكەتتىك قوردان قارجى شىعىندالماۋى ءتيىس. سونىمەن قاتار، ۇلتىمىزدىڭ ۇلىقتىلىعى مەن ءتالىم-تاربيەسىن ناسيحاتتاۋ ءۇشىن "قازاقستان ارۋى" بايقاۋىنىڭ فورماتىن وزگەرتكەن ءجون دەيدى.
