Elimizdegi týrızmdi damytýǵa bólingen qarajat "Qazaqstan arýy-2019" baıqaýyn ótkizýge jumsalǵan. Onda da baqandaı 73 mıllıon teńgeden astam qarjy konkýrsqa qatysatyn arýlardy iriktep alýǵa ǵana ketken. Mundaı qyzyq derek qazyna qarjysynyń qalaı jumsalyp jatqany baqylaıtyn Esep komıtetiniń otyrysynda aıtyldy.
Qazaqstanda týrızmdi damytýǵa bólingen 73 mıllıon teńge «Qazaqstan arýy-2019» baıqaýyn ótkizýge jumsalǵan.
Osylaısha, halyqtyń salyǵynan túsken qarjyny quzyrly organ ókilderi ózimbilermendikke salyp, maqsatsyz jumsapty. Degenmen, olar ketken qarjyny qazaqtyń sulý qyzdaryn kórý úshin keletin qytaılyq jáne úndistandyq týrısterdiń esebinen qaıtaryp alamyz dep aqtalǵan, dep habarlaıdy "Eýrazııa birinshi arnasy".
Bıyl ótetin osy baıqaýdyń tek irikteý kezeńine ǵana qazynadan 73 mıllıon 200 myń teńge qarjy jumsalyp otyr. Bul tek bastapqy shyǵyn. Ary qaraı taǵy qansha qarajat qajet ekenin dóp basyp aıtý qıyn, ázirge. Al, jospar boıynsha bul aqsha elimizge týrıster tartý maqsatynda uıymdastyrylatyn 5 ınvestıııalyq forým men osynsha memorandým bekitýge ketýi tıis bolǵan.
«Bul Týrızm ındýstrııasy komıtetiniń qarajatty durys josparlamaýynan týyndap otyrǵan másele. Eldiń týrıstik áleýetin arttyrý úshin sheteldik jáne otandyq ınvestorlar, barlyǵy 250 adam qatysýy tıis forýmdar ótpegen. Onyń ornyna týrızmge túk qatysy joq "Qazaqstan arýy " baıqaýynyń irikteýin uıymdastyrylǵan», - deıdi respýblıkalyq bıýdjettiń atqarylýyn baqylaý jónindegi esep komıtetiniń múshesi Baqyt Jaqan.
Al mádenıet jáne sport vıe-mınıstri sulýlyq baıqaýynyń týrızmge tikeleı qatysy bar deıdi. Tipti, sheteldik azamattar "qazaqtyń has sulýlaryn kórip, tańdaı qaqqanynda turǵan ne bar?" - dep jaýap berdi.
«Biz týrıstik bıznesti zertteı kele, bul baıqaýdyń osy salaǵa tikeleı qatysy bar ekenin anyqtadyq. Osylaısha, búginde qytaılyq jáne úndilik týrıster osy baıqaýdy asyǵa kútetine kóz jetkizdik. Sebebi, olardyń kóbisi osy arýlar saıysyn ǵalamtor jáne teledıdar arqyly tamashalaıdy eken. Kelip kórgisi keletinderi de kóp. Ótken jyly ótken «Qazaqstan arýynda» Qytaı men Úndistannan 400 adam kelgen. Qazaq qyzdarynyń sulýlyǵymen sheteldikterdiń tamsanýyn durys dep esepteımin», - deıdi QR mádenıet jáne sport mınıstriniń orynbasary Erlan Qojaǵapanov.
Al qoǵam belsendileri bundaı saıystar qazaq qoǵamyna qonymsyz dúnıe ekenin aıtady. Tipti, buǵan memleket tarapynan qarjy jumsalýynyń ózi durys emes deıdi.
«Birden-bir negizgi eń bir ońtaıly joly bul "Qazaqstan arýy" baıqaýyn ótkizý emes. Oǵan keletin týrısterdiń de sany asa kóp bolady dep senýge bolmaıdy. Jáı bir sondaı jeńil oıly adamdar qyzyqtaýy múmkin. Ol búkil álemniń qansha paıyzy ekenin qazir aıtý qıyn. Degenmen kóp adam ony qyzyq kórmeıdi», - deıdi qoǵam belsendisi Qýandyq Shamaqaıuly.
Al qoǵam qaıratkerleri osyndaı mádenı sharalarǵa ınvestorlardy jumyldyrý qajettigin aıtady. Memlekettik qordan qarjy shyǵyndalmaýy tıis. Sonymen qatar, ultymyzdyń ulyqtylyǵy men tálim-tárbıesin nasıhattaý úshin "Qazaqstan arýy" baıqaýynyń formatyn ózgertken jón deıdi.
