ءاليحان اليەۆپەن كەزدەستى

1734
Adyrna.kz Telegram
فوتو: t.me/KZgovernment
فوتو: t.me/KZgovernment

پرەمەر-مينيستر ءاليحان سمايىلوۆ ازىربايجانعا رەسمي ساپارىندا وسى ەلدىڭ پرەزيدەنتى يلحام اليەۆپەن كەزدەستى، دەپ حابارلايدى “ادىرنا” ۇلتتىق پورتالى.

كەزدەسۋ بارىسىندا قازاقستان مەن ءازىربايجان ءوزارا ساۋدا كولەمىن 1 ملرد دوللارعا دەيىن جەتكىزۋدى جوسپارلاپ وتىرعانى ايتىلدى.

سونداي-اق، ۇكىمەت باسشىسى قاسىم-جومارت توقاەۆتىڭ ىستىق سالەمىن جەتكىزىپ، ءازىربايجان حالقىنىڭ كوشباسشىسى گەيدار اليەۆتىڭ بيىل اتالىپ وتىلەتىن 100 جىلدىق مەرەيتويىنىڭ ماڭىزى زور ەكەنىن ايتتى.

ول ەكى ەل اراسىنداعى قارىم-قاتىناستار سەنىم مەن ءوزارا تۇسىنىستىككە نەگىزدەلگەن ستراتەگيالىق ارىپتەستىك پەن وداقتاستىقتىڭ جارقىن ۇلگىسى ەكەنىن اتاپ ءوتتى.

ءازىربايجان – قازاقستاننىڭ وڭتۇستىك كاۆكازداعى ەڭ ماڭىزدى ساۋدا-ەكونوميكالىق سەرىكتەسى. وتكەن جىلدىڭ قورىتىندىسى بويىنشا ەكىجاقتى تاۋار اينالىمى 40%-عا ءوسىپ، $460 ملن-نان استى. بيىلعى 4 ايدىڭ قورىتىندىسىنا سايكەس ءوزارا ساۋدا اينالىمى 185 ملن دوللار بولىپ، 40%-عا ارتتى.

تاۋار اينالىمىن 1 ملرد دوللارعا جەتكىزۋ جونىندەگى الدىمىزعا قويىلعان مىندەتكە سايكەس، ءبىز ءازىربايجان ۇكىمەتىمەن بىرلەسىپ، ساۋدا-ەكونوميكالىق قارىم-قاتىناستاردى كەڭەيتۋ بويىنشا جۇمىس ىستەپ جاتىرمىز، — دەدى ءاليحان سمايىلوۆ.

ال يلحام اليەۆ پرەمەر-ءمينيستردىڭ ازىربايجانعا رەسمي ساپارى ەكى ەل اراسىنداعى دوستىق قارىم-قاتىناستى ودان ءارى دامىتۋعا ىقپال ەتەتىنىنە سەنىم ءبىلدىردى.

ءبىزدىڭ ىنتىماقتاستىعىمىزدىڭ كۇن ءتارتىبى وتە اۋقىمدى. ول جىلدان جىلعا كەڭەيىپ كەلەدى. پرەزيدەنتتەر دەڭگەيىندە قابىلدانعان كەلىسىمدەردىڭ جۇزەگە اسىرىلىپ جاتقانىنا قۋانىشتىمىن. بۇل ەكى ەل اراسىنداعى قارىم-قاتىناستىڭ وتە جوعارى دەڭگەيدە ەكەنىن كورسەتەدى. سونىمەن قاتار ولاردى ءارى قاراي دامىتۋ ءۇشىن بىزدە وراسان زور الەۋەت بار. ءبىز كەلىسكەن شارالاردى ىسكە اسىرۋ تاۋار اينالىمىنىڭ ۇلعايۋىنا ىقپال ەتىپ، ەنەرگەتيكا، كولىك جانە باسقا سالالاردا بۇدان دا اۋقىمدى جوبالاردى جۇزەگە اسىرۋ ءۇشىن بيزنەسكە قوسىمشا مۇمكىندىكتەر جاسايدى، — دەدى يلحام اليەۆ.

پىكىرلەر