قر پرەمەر-ءمينيسترى ءاليحان سمايىلوۆ كاسىپكەرلىك قىزمەتتە «تازا پاراقتان باستاپ» رەتتەۋدى ەنگىزۋ جانە مەملەكەتتىك باقىلاۋ مەن قاداعالاۋدى اۆتوماتتاندىرۋ جونىندە كەڭەس وتكىزدى، دەپ حابارلايدى « ادىرنا» ءتىلشىسى.
ۇلتتىق ەكونوميكا ءمينيسترى الىبەك قۋانتىروۆ كولىك، ساۋدا، قوعامدىق تاماقتانۋ، قوناق ءۇي قىزمەتتەرى، جىلجىمايتىن مۇلىكپەن وپەراتسيالار، تاۋ-كەن ءوندىرۋ ونەركاسىبى، كومپيۋتەرلىك باعدارلامالاۋ، تۇتىنۋشىلاردىڭ قۇقىقتارىن قورعاۋ، اقپارات جانە بايلانىس سالالارىنداعى رەتتەۋشى اكتىلەرگە جۇرگىزىلگەن تالداۋ اياقتالعانىن اتاپ ءوتتى.
ونىڭ قورىتىندىسى بويىنشا انىقتالعان 22 مىڭنان استام تالاپتىڭ شامامەن 3,8 مىڭى (17%) جاڭا رەتتەۋشىلىك ساياساتتىڭ بازالىق شارتتارىنا سايكەس كەلمەيدى، سوندىقتان ولاردىڭ كۇشى جويىلادى نەمەسە قايتا قارالادى.
وسى جۇمىستىڭ ءبىرىنشى كەزەڭى اياسىندا تاعى جەتى سالا بويىنشا تالداۋ جالعاسىپ جاتىر. بۇل اۋىل شارۋاشىلىعى، قويمالاۋ، قۇبىر كولىگى، قۇرىلىس، اۆتوموبيلدەر مەن موتوتسيكلدەردى جوندەۋ، كوشى-قون، اۆتورلىق قۇقىق جانە ارالاس قۇقىقتارعا قاتىستى.
پرەمەر-مينيستر ءتيىستى ۇيلەستىرۋدىڭ بولماۋىنان كەيبىر مەملەكەتتىك ورگاندار بەلگىلەنگەن مەرزىمدەردى ساقتامايتىنىن جانە بۇل بەكىتىلگەن جوسپار-كەستەنى ورىنداۋدى كەشىكتىرەتىنىن اتاپ ءوتتى.
«بۇل رەفورمانىڭ ماڭىزدى ەكەنىن تاعى دا قايتالايمىن. ۇنەمى كەيىنگە قالدىرا بەرۋگە بولمايدى، بۇل تۋرالى قانشا ايتۋعا بولادى؟ بارلىق نەگىزسىز تالاپتاردى تەزىرەك الىپ تاستاۋىمىز كەرەك. رەتتەۋشى اكتىلەر بويىنشا بارلىق جۇمىستى بيىل اياقتاۋ قاجەت»، — دەدى ءاليحان سمايىلوۆ.
پرەمەر-مينيستر بيزنەسكە قويىلاتىن جاڭا تالاپتاردى ەنگىزۋدە وتە مۇقيات بولۋ كەرەكتىگىن ايتتى.
«جاڭادان قابىلداناتىن رەتتەۋشىلىك تالاپتارعا باقىلاۋدى كۇشەيتۋىمىز كەرەك. ەگەر "اتامەكەن" ۇكپ تاراپىنان قانداي دا ءبىر ماسەلە بويىنشا كەلىسپەۋشىلىك بولسا، وندا بۇل ماسەلەنى شەشۋ كەرەك، بۇعان كوز جۇما قاراۋعا بولمايدى»، — دەدى ءاليحان سمايىلوۆ.
سونىمەن قاتار وتىرىستا مەملەكەتتىك باقىلاۋ جۇيەسىن تولىق اۆتوماتتاندىرۋعا كوشۋ اياسىندا مەملەكەتتىك ورگانداردىڭ اقپاراتتىق جۇيەلەرىن تالداۋ اياقتالىپ، سالالىق تاۋەكەلدەر ماتريتسالارى قالىپتاستىرىلعانى اتاپ ءوتىلدى.
بۇگىنگى تاڭدا «Smart Data Ukimet» اقپاراتتىق-تالداۋ جۇيەسى جاڭارتىلىپ جاتىر، ونى 2023 جىلدىڭ ورتاسىندا پايدالانۋعا بەرۋ جوسپارلانىپ وتىر.
سونداي-اق پرەمەر-مينيستر بۇل جۇمىستى جانداندىرۋدى جانە مەملەكەتتىك ورگاندارمەن كەلىسۋ مەرزىمدەرىن قىسقارتۋدى قايتا قاراۋدى تاپسىردى.
