قازاق حالقىنىڭ ۇلت بولىپ قالىپتاسۋ كەزەڭىنەن باستاپ ونەردەن كەم دە بولماعان. ونەردىڭ قاي ءتۇرىن الساڭىزدا قازاق حالقىنىڭ بويىنان تابىلىپ كەلەدى.
ەڭ العاش اعاش پەن سۇيەكتەن ويۋلاپ تۇرمىستىق زاتتار جاساۋ، بەينەلەۋ ونەرى، كەيىنگى كەزەڭدەردە شابىتتى پوەزيامەن، ورىندى شەشەندىكپەن، جالىندى كۇيلەر جانە شىن جۇرەكتەن شىققان اندەرمەن ءومىر سۇرگەن. ياعني، سازدى اۋەنمەن قازاقتىڭ بۇكىل ءومىرى بايلانىستى بولعان دەسەكتە بولادى. بەرتىن كەلە سپورتتىڭ سان ءتۇرى، ساحنا ونەرىنىڭ قىر-سىرىن مەڭگەرىپ، الەمدىك دودالاردا بايگە بەرمەي كەلە جاتقان تالانتتار بارشىلىق. قازىرگى جاھاندانۋ ۇدەرىسى شاپشاڭ ءجۇرىپ جاتقان ۋاقىتتا ۇلتتىق تاربيە، ۇلتتىق رۋحتى جوعالتپاۋ – ۇلكەن مىندەت ەكەنى بارىمىزگە ايان. ۇلتتىق بولمىس پەن ونەردى بايلانىستىرىپ، كاسىبيلىككە جەتكىزە ءبىلۋ بۇل تالانتتى جانداردىڭ ۇلكەن ەڭبەكتەرىنىڭ ارقاسىندا ەكەنىن مويىنداپ كەلەمىز. جانە دە بولاشاقتا ۇلتتىڭ تابىستى بولۋى ونىڭ تابيعي بايلىعىمەن ەمەس، ادامدارىنىڭ باسەكەلىك قابىلەتىمەن ايقىندالادى. سونىڭ ىشىندە جاستار – كەز كەلگەن قوعامنىڭ بولاشاعى مەن قوزعاۋشى كۇشى.
مەملەكەتتىڭ تۇراقتى دامۋىنىڭ نەگىزى – باسەكەگە قابىلەتتى جاستار بۋىنى، ال بۇل تىكەلەي جاس قازاقستاندىقتاردىڭ ءبىلىم مەن بىلىك ساپاسىنا، ولاردىڭ ۇمتىلىسى مەن ىنتاسىنا بايلانىستى. تاۋەلسىز قازاقستاننىڭ ەركىن وسكەن ۇرپاقتارىنىڭ ءتۇرلى سالادا بيىك تۇعىرىنان كورىنىپ، كوك تۋىمىزدى جەلبىرەتىپ جۇرگەنى وتە قۋانتارلىق جاعداي. ەلىمىزدە ءبىلىم، ونەر، سپورت جانە باسقا دا ماڭىزدى سالالار بويىنشا شوق جۇلدىزدار جارقىراپ كەلەدى. سونداي-اق، كينو الەمىندە دە كاسىبيلىككە جەتىپ، دۇنيەجۇزىلىك جۇلدەلەرگە يە بولىپ جۇرگەن رەجيسسەرلەردە بارشىلىق. سولاردىڭ ءبىرى قازاقتىڭ ماڭدايىنا بىتكەن شوق جۇلدىزى، دارىندى رەجيسسەر شاكەن ايمانوۆ اتامىزدىڭ كاسىبىن تاڭداپ، ءىزىن جالعاستىرۋشى تالانتتى قازاقتىڭ قارشاداي قىزى ديانا امانگەلدىقىزى.
قۋانىش ديانا امانگەلدىقىزى الماتى قالاسىندا تۋىپ-وسكەن. قالامىزداعى تەرەڭ ويلى، وزىق وقۋشىلاردى وقىتاتىن «زەردە» گيمنازياسىن 11 جىل وقىپ، اقش-تاعى الەمگە ايگىلى New York Film Academy-عا وقۋعا تۇسەدى. ءتورت جىل ءبىلىم ورداسىندا ۇزدىك وقىپ، كينورەجيسسەر ماماندىعى بويىنشا ديپلومىن ءساتتى قورعاپ شىقتى. جاس رەجيسسەر ءوزىنىڭ ديپلومدىق جۇمىسىنا ارنالعان «تال تۇبىندەگى كەزدەسۋ» اتتى قىسقا مەتراجدى ءفيلمىن تۋعان ەلىندە تۇسىرگەن. تۋىندىدا ءوز اتا-اناسىنىڭ تانىسۋ حيكاياسىن بايانداي وتىرىپ، توقسانىنشى جىلدارداعى ءومىر ءسۇرۋ سالتىن، كيىنۋ ستيلدەرىن، ادامداردىڭ ومىرگە دەگەن كوزقاراسىن، بولاشاققا دەگەن ارماندارىن ايقىن بەينەلەي وتىرىپ، ەكى جاستىڭ ءمولدىر ماحابباتىن كورسەتە ءبىلدى. ماحابباتتىڭ قانشالىقتى قۇدىرەتتى سەزىم ەكەنىن جانە دە ءبىر كورگەننەن عاشىق بولۋ، ەكى جاس ءبىر-بىرىنە سەنىم ءبىلدىرۋ ارقىلى ۇلكەن قارىم-قاتىناس قۇرا الاتىنىن بەينەلەگەن. شىنايى ءومىر جەلىسىمەن تۇسىرىلگەن تاسپادا ديانا قىزدىڭ ەس بىلگەلى اتا-اناسىنىڭ ارالارىنداعى ءتاتتى سەزىمدەرىنە، شىنايى سۇيىسپەنشىلىگىنە جانە ءبىر-بىرىنە دەگەن زور قۇرمەتىنە كۋا بولىپ وسكەنى بايقالادى. بۇنداي وتباسىدان تۋىپ-وسكەن بالالار دا وتە مەيىرىمدى، اينالاسىنا قومقور، ارمانىنا قول جەتكىزە الاتىن تۇلعا بولىپ وسەتىنى انىق. مىنە، وعان دالەل ديانا امانقىزى. بالا كەزدەن ارمانى New York Film Academy ءتالىم الىپ، ەلىنىڭ دامۋىنا ونىڭ ىشىندە كينو الەمىنە ءوز ۇلەسىن قوسۋ ەكەن. قازاقتا «بولاتىن بالانىڭ بەتىن قاقپا، بەلىن بۋ!» دەپ بەكەر ايتپاسا كەرەك. جاس ۇرپاقتىڭ ارمانىنا قانات ءبىتىرىپ، سەنىمدەرىنە سەلكەۋ تۇسىرمەي، قولداپ جىبەرسە بولعانى، الا المايتىن قامالى بولماس. ۇلتىمىزدىڭ ەرتەڭگى بولاشاعى وسىنداي تالانتتاردىڭ بيىككە ۇمتىلۋىنان باستالاتىنىن ۇمىتپايىق.
