Parlament palatalarynyń birlesken otyrysynda Senat depýtaty Nurtóre Júsip jastarǵa erekshe kóńil bólý qajettigin aıtty, dep habarlaıdy «Adyrna» tilshisi.
«Resmı derekterge súıensek, elimizde 5,7 mıllıonnan astam jas bar. Byltyr Memlekettik jastar saıasaty týraly zańǵa eleýli tolyqtyrýlar engizildi. Jastar sanatyn 29-dan 35-ke deıin arttyrdyq. Sonyń negizinde NEET jastarynyń sany 223 myńnan bir jylda 422 myńǵa ósti. Salalyq mınıstrlik birrettik granttar berý, jastar praktıkalaryn uıymdastyrý, bos jumys oryndary jármeńkelerin ótkizý sııaqty naýqandyqpen sharalarmen shektelip otyr. Jastarmen jandy jumys júrgizý kerek. Elimizde azamattarǵa sapaly, joǵary bilim berý, tehnıkalyq jáne kásiptik daǵdylardy oqyp-úıretý, olardy áleýmettendirý jáne jumyspen qamtý sharalary búgingi kúnniń talaptaryna tolyq jaýap bermeı otyr»,–dedi ol.
Depýtat Qazaqstan jastary eldegi jumys kúshiniń shamamen 40 paıyzyn ǵana quraıtynyn atap ótti.
«Joǵary bilimdi qazaqstandyq jastardyń 40 paıyzdan astamy óz mamandyǵy boıynsha jumys istemeıdi. Al túlekterdiń 30 paıyzdan astamy jumys taba almaıdy. Bulardyń ishinde memleketttik tapsyryspen oqyǵandary da jetkilikti. Qazaqta «Arqa jaıly bolsa, arqar aýyp nesi bar?» degen sóz bar. Osyndaı jaǵymsyz faktorlardyń kesirinen jastardyń jaıly ómir izdep, shetelge qonys aýdarýy jıilep jatqan sııaqty. Bıylǵy 1 sáýirdegi statıstıkaǵa qarasaq, 600-den astam jas shetelge qonys aýdarǵan»,—dedi Nurtóre Júsip.
