قىزىلوردا وبلىسىندا تىكۇشاق قۇلادى: قازا بولعاندار بار

1827
Adyrna.kz Telegram
27 ناۋرىز كۇنى ساعات 17:35-تە "112" پۋلتىنە قىزىلوردا وبلىسى، جالاعاش اۋدانىندا مي-8 تىكۇشاعىنىڭ قۇلاعانى جايلى حابارلاما كەلىپ تۇسكەن. بۇل تۋرالى "ادىرنا" پورتالى قر ءىىم تجك ءباسپاسوز قىزمەتىنە سىلتەمە جاسايدى.

ۆەدومستۆو اتاپ وتكەندەي تىكۇشاق بىلگىسىز جاعدايدا قۇلاپ، تولىعىمەن جانىپ كەتكەن.

"اتالمىش اۋە كەمەسى قر قورعانىس مينيسترلىگىنە تيەسىلى. اپاتتىڭ ءمان-جايى انىقتالىپ جاتىر", - دەپ اتاپ ءوتتى تجك.

تىكۇشاقتىڭ قۇلاعانى جايلى اقپاراتتى قورعانىس مينيسترلىگى راستاپ، وقيعانىڭ ءمان -جايىن تولىعىراق باياندادى.

مينيسترلىكتىڭ مالىمەتىنشە، 27 ناۋرىزدا قر قك اكق اسكەري اۋە كۇشتەرىنىڭ تىكۇشاعى اپاتقا ۇشىراعان. بورتتا 13 ادام بولعان.

الدىن-الا مالىمەت بويىنشا، وقيعا ورنىندا قازا بولعاندار بار. قازىر زارداپ شەككەندەردىڭ جاعدايى انىقتالۋ ۇستىندە.

تىكۇشاق 4 بىردەي اسكەري تىكۇشاق قۇرامىنان قۇرالعان توپپەن بىرگە اقتاۋ قالاسىنان شىمكەنتكە ۇشىپ بارا جاتقان.

"ۇشۋ كەشەندى تەكسەرىس جانە "التىن جەبە" ارنايى بولىمشەلەرىنىڭ جاتتىعۋى اياسىندا قاراڭعى ۋاقىتتا ءارى مەتەورولوگيالىق كۇردەلى جاعدايدا وتكىزىلگەن. قورعانىس ءمينيسترى نۇرلان ەرمەكباەۆتىڭ بۇيىرىعىمەن ارنايى قۇرىلعان قورعانىس مينيسترلىگىنىڭ كوميسسياسى وقيعا ورنىنا جىبەرىلدى", - دەلىنگەن حابارلامادا.

قازىرگى تاڭدا ءتورت تىكۇشاقتىڭ ەكەۋى قونعان. ولار قىزىلوردا قالاسىندا. ال بىرەۋى وقيعا ورنىنا قايتا ورالعان.

قورعانىس مينيسترلىگى مەن ءىىم بىرلەسىپ، اپاتتىڭ سەبەبىن انىقتاۋ ءۇشىن تەرگەۋ جۇمىستارىن باستادى.

پىكىرلەر