پاۆلودار مەن پەتروپاۆل اكىمدىكتەرىنىڭ وكىلدەرى قالا اتاۋىن وزگەرتۋ تۋرالى ۇسىنىسقا قاتىستى پىكىر ءبىلدىردى، - دەپ حابارلايدى Tengrinews.kz ءتىلشىسى.
سقو اكىمدىگىنىڭ وكىلدەرى پەتروپاۆل قالاسىنىڭ اتاۋىن وزگەرتۋدى جوسپارلاپ وتىرماعانىن اتاپ ءوتتى. "قازىرگى ۋاقىتتا باق-تا جانە الەۋمەتتىك جەلىلەردە سولتۇستىك قازاقستان وبلىسىنىڭ ورتالىعىن جانە ەلىمىزدىڭ باسقا دا قالارىنىڭ اتاۋىن وزگەرتۋ ماسەلەسى تالقىلانىپ جاتىر. رەسمي تۇردە حابارلايمىز، بۇگىندە سقو اكىمدىگى پەتروپاۆل قالاسىنىڭ اتاۋىن وزگەرتۋدى جوسپارلاپ وتىرعان جوق", - دەدى سولتۇستىك قازاقستان وبلىسى اكىمدىگى ءباسپاسوز قىزمەتىنىڭ وكىلدەرى.
پاۆلودار قالاسىنىڭ اتاۋىن كەنەسارى دەپ وزگەرتۋدى اكىمدىك وكىلدەرى "جەكە ادامنىڭ پىكىرى" دەپ باعالادى. "بۇل وزگەرتۋ تۋرالى ۇسىنىس جاساعان جەكە ادامنىڭ پىكىرى. بۇگىندە پاۆلودار اتاۋىن وزگەرتۋ ماسەلەسى قاراستىرىلىپ جاتقان جوق. اكىمدىكتە ەشقانداي باستاما كوتەرىلگەن ەمەس", - دەدى پاۆلودار وبلىسى اكىمدىگى ءباسپاسوز قىزمەتىنىڭ وكىلدەرى.
ەسكە سالايىق، وسىعان دەيىن "قازاقستان-2050" دەموكراتيالىق كۇشتەردىڭ جالپىۇلتتىق كواليتسياسىنىڭ وتىرىسىندا "اق جول" دەموكراتيالىق پارتياسى توراعاسىنىڭ ورىنباسارى قازىبەك يسا قالا اتاۋىن وزگەرتۋ تۋرالى ۇسىنىس بىلدىرگەن ەدى. "قازاقستان ەلورداسىنا ەلباسىنىڭ ەسىمىن بەرە وتىرىپ، ءبىز وسى وقيعاعا باسقا دا اتاۋلاردى جالعاستىرۋىمىز كەرەك. پەتروپاۆلعا ابىلاي حاننىڭ ەسىمىن بەرۋ قاجەت، ول ءوز ۋاقىتىندا ءوزىنىڭ ورداسىن تىگىپ، ءۇش ءجۇزدىڭ باسىن قوستى. پاۆلودارعا ءوز حالقىنىڭ تاۋەلسىزدىگى ءۇشىن كۇرەسكەن قازاقتاردىڭ سوڭعى حانى كەنەسارى ەسىمىن بەرۋ قاجەت. بۇرىن الاش (سەمەي) دەپ اتالاتىن قالاعا الاشوردا ۇكىمەتىنىڭ توراعاسى ءاليحان بوكەيحانوۆتىڭ اتىن بەرۋ كەرەك", - دەدى قازبەك يسا.
قازاقستان پرەزيدەنتى قاسىم-جومارت توقاەۆ 20 ناۋرىزدا استانا اتاۋىن وزگەرتۋ تۋرالى ۇسىنىس تاستادى. 23 ناۋرىزدا رەسمي تۇردە استانانىڭ نۇر-سۇلتان بولىپ وزگەرگەنى تۋرالى قاۋلى شىقتى.
نارىن قالي
