Pavlodar men Petropavl ákimdikteriniń ókilderi qala ataýyn ózgertý týraly usynysqa qatysty pikir bildirdi, - dep habarlaıdy Tengrinews.kz tilshisi.
SQO ákimdiginiń ókilderi Petropavl qalasynyń ataýyn ózgertýdi josparlap otyrmaǵanyn atap ótti. "Qazirgi ýaqytta BAQ-ta jáne áleýmettik jelilerde Soltústik Qazaqstan oblysynyń ortalyǵyn jáne elimizdiń basqa da qalarynyń ataýyn ózgertý máselesi talqylanyp jatyr. Resmı túrde habarlaımyz, búginde SQO ákimdigi Petropavl qalasynyń ataýyn ózgertýdi josparlap otyrǵan joq", - dedi Soltústik Qazaqstan oblysy ákimdigi baspasóz qyzmetiniń ókilderi.
Pavlodar qalasynyń ataýyn Kenesary dep ózgertýdi ákimdik ókilderi "jeke adamnyń pikiri" dep baǵalady. "Bul ózgertý týraly usynys jasaǵan jeke adamnyń pikiri. Búginde Pavlodar ataýyn ózgertý máselesi qarastyrylyp jatqan joq. Ákimdikte eshqandaı bastama kóterilgen emes", - dedi Pavlodar oblysy ákimdigi baspasóz qyzmetiniń ókilderi.
Eske salaıyq, osyǵan deıin "Qazaqstan-2050" Demokratııalyq kúshterdiń jalpyulttyq koalıııasynyń otyrysynda "Aq jol" demokratııalyq partııasy tóraǵasynyń orynbasary Qazybek Isa qala ataýyn ózgertý týraly usynys bildirgen edi. "Qazaqstan elordasyna Elbasynyń esimin bere otyryp, biz osy oqıǵaǵa basqa da ataýlardy jalǵastyrýymyz kerek. Petropavlǵa Abylaı hannyń esimin berý qajet, ol óz ýaqytynda óziniń ordasyn tigip, úsh júzdiń basyn qosty. Pavlodarǵa óz halqynyń táýelsizdigi úshin kúresken qazaqtardyń sońǵy hany Kenesary esimin berý qajet. Buryn Alash (Semeı) dep atalatyn qalaǵa Alashorda úkimetiniń tóraǵasy Álıhan Bókeıhanovtyń atyn berý kerek", - dedi Qazbek Isa.
Qazaqstan Prezıdenti Qasym-Jomart Toqaev 20 naýryzda Astana ataýyn ózgertý týraly usynys tastady. 23 naýryzda resmı túrde Astananyń Nur-Sultan bolyp ózgergeni týraly Qaýly shyqty.
Naryn Qalı
