مەملەكەت باسشىسى قاسىم-جومارت توقاەۆ انا مەن بالا ۇلتتىق عىلىمي ورتالىعىنا باردى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ الدىمەن ورتالىقتاعى سمارت سىنىپتىڭ جۇمىسىمەن تانىستى. ەم الىپ جاتقان بالالار وقۋدان قول ءۇزىپ قالماۋى ءۇشىن «اقىلدى سىنىپ» ۇيىمداستىرىلعان. مۇندا مەكتەپ باعدارلاماسىنا سايكەس ماتەماتيكا، تاريح جانە باسقا دا پاندەر وقىتىلادى.
پرەزيدەنت رەسپۋبليكانىڭ ءار وڭىرىنەن كەلىپ، ەم الىپ جاتقان بالالارمەن اڭگىمەلەستى. مەملەكەت باسشىسى جەتكىنشەكتەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.
پرەزيدەنتكە بالالار بولىمشەلەرىندە 351 بالا ەم الىپ جاتقانى تۋرالى باياندالدى. بيىل بۇل جەردە 18 مىڭعا جۋىق بالا ەمدەلگەن.
قاسىم-جومارت توقاەۆ ورتالىقتاعى بالالاردى جاڭا جىل مەرەكەسىمەن قۇتتىقتاپ، بارلىعىنا سىيلىق ۇلەستىردى.
