Qasym-Jomart Toqaev Abaı oblysyna kelýine oraı joldardyń jedel jóndelgenine qatysty pikir bildirdi. Bul týraly Aqorda jarııalady, dep habarlaıdy “Adyrna” ulttyq portaly.
Ormanshylardyń otbasy músheleriniń biri Toqaevqa aýylda joldyń bolmaǵany týraly aıtty.
Bizdiń Ýspenka aýylynda eshqashan asfalt bolǵan emes. Shaǵal jol ǵana. Mundaǵy adamdar asfaltty ómirinde kórmegen. Tipti qazir órt sóndirýge kelgenderdiń kóligi de durys júre almady. Jol jóndeńder dep shaǵymdansaq, ótinishimizge qulaq asqan emes. Ylǵı «qarjy joq» dep qaıtarady. Al qazir siz keledi degen soń joldardy jóndep shyqty, ádemilep bylaı jamap qoıǵan. Qarańyzshy, - dedi ol.
Memleket basshysy jaýaptylar jazalanatynyn aıtty.
Men keledi dep aıaq astynan jol jóndeı bastaý durys emes. Bul – múldem masqara jaǵdaı. Men bul týraly oqydym, bilemin. Kináliler jazalanady, - dedi Memleket basshysy.
Eske salaıyq, keshe jelide «Abaı oblysyna Prezıdent keletin bolǵan soń joldar shuǵyl jóndelip, asfalt jamalyp jatqany» jaıly habar tarady. Telearnadan arnaıy sıýjet te kórsetildi.
Osyǵan baılanysty Abaı oblysynyń ákimdigi bul aqparatty joqqa shyǵaryp, málimdeme jasaǵan bolatyn.
«Borodýlıha-Jernovka-Pollog» aýdandyq mańyzy bar jolynda kólik quraldarynyń, onyń ishinde qutqarý qyzmeti men volonterlerdiń qozǵalys qarqyny artty. Osyǵan baılanysty órt sóndirý shtabyna kelip-ketetin avtomobıl aǵynyn eskere otyryp, qaýipsiz qozǵalysty qamtamasyz etý jáne júrý bóligin shańnan aryltý maqsatynda joldaǵy shuńqyrlar ýaqytsha biteldi, - dep habarlaǵan bolatyn ákimdik.
