بەلگىلى مەملەكەت جانە قوعام قايراتكەرى بەردىبەك ماشبەكۇلى ساپارباەۆ 71 جاسقا قاراعان شاعىندا دۇنيەدەن وزدى. قايعىلى حاباردى «قازاقستان» ۇلتتىق ارناسى جەتكىزدى، دەپ حابارلايدى "ادىرنا" ۇلتتىق پورتالى
جۋرناليست باۋىرجان ومارۇلى ءوز پاراقشاسىندا قايعىلى قازاعا قاتىستى:
بۇكىل ءومىرى جۇمىسپەن ءوتتى. ءبىر اۋىق تىنىس الۋدى بىلگەن جوق. بەس وڭىردە ءىزى قالدى. ءبارىبىر جالعان دۇنيە بەس-اق كۇندىك ەكەن. بەردىبەك اعام دا باقيعا اتتاندى. "ارعىماققا ايداي تاعا قاقتىرعان" ازامات ەدى. تاربيەسىن كوردىك. تاعىلىمىن الدىق. تاجىريبەسىن تۇيسىندىك. باق قونعان بايتەرەك-ءتى. بيىك ەدى. بولەك ەدى. سايالى ەدى. ايالى ەدى... ءبىزدىڭ اۋباكىر سمايىلوۆتىڭ "قايران مۇقاڭ، قارا ولەڭنىڭ شىنارى، شىنار عانا شىنارلارشا سىنادى", - دەگەن جىر جولدارى بار-دى. شيراق جۇرگەن بەردىبەك اعام دا شىنارلارشا شارت سىندى. "شامىرقانسام، شاتىناپ سىنار بولاتپىن" دەگەن ماحامبەت اقىن... نەگە شامىرقاندىڭىز ەكەن، بەردىبەك اعا... حوش، قۇلجاداي ايبار ءمۇيىزدىم... - دەپ جازدى.
بەردىبەك ماشبەكۇلى 1953 جىلى 9 اقپاندا قىزىلوردا وبلىسى جاڭاقورعان اۋدانىنىڭ بەسارىق اۋىلىندا تۋعان.
1977 جىلى الماتى حالىق شارۋاشىلىعى ينستيتۋتىن «ەكونوميكا جانە ماتەريالدىق-تەحنيكالىق جابدىقتاۋ» ماماندىعى بويىنشا ءبىتىردى.
ەكونوميكا عىلىمدارىنىڭ دوكتورى، پروفەسسور.
ەڭبەك جولىن قىزىلوردا وبلىسىنىڭ زادارينسكي سوۆحوزىنىڭ جۇمىسشىسىنان باستادى (1969-1971 جىلدارى); اسكەري قىزمەتىن وتكەردى (1971-1973 جىلدارى).
ينستيتۋتتى بىتىرىسىمەن رەسپۋبليكالىق مەملەكەتتىك ەڭبەك جيناقتاۋ كاسسالارى (گوسترۋدسبەركاسسى) باسقارماسىندا ەكونوميست (1977); قازكسر قارجى مينيسترلىگىندە ەكونوميست، اعا ەكونوميست، جەتەكشى، باس ەكونوميست، ءبولىم باستىعىنىڭ ورىنباسارى (1977-1988 جىلدارى); جوسپارلاۋ-قارجى باسقارماسىنىڭ باستىعى، باس ەكونوميكا باسقارماسىنىڭ باستىعى، قازاقستان رەسپۋبليكاسى ءبىلىم ءمينيسترىنىڭ ورىنباسارى (1988-1993 جىلدارى); پرەزيدەنت اپپاراتى ءبولىمى مەن قازاقستان رەسپۋبليكاسى مينيسترلەرى كابينەتى مەڭگەرۋشىسىنىڭ ورىنباسارى (1993); قازاقستان رەسپۋبليكاسى مينيسترلەر كابينەتى ىستەر باسقارماسىنىڭ قارجى، ەڭبەك جانە الەۋمەتتىك قورعاۋ ءبولىمى مەڭگەرۋشىسىنىڭ ورىنباسارى جانە مەڭگەرۋشىسى (1994-1995 جىلدارى) بولدى.
قازاقستان رەسپۋبليكاسى مينيسترلەر كابينەتى اپپاراتىنىڭ باسشىسى (1995); قىزىلوردا وبلىسىنىڭ اكىمى (1995-1999 جىلدارى); وڭتۇستىك قازاقستان وبلىسىنىڭ اكىمى (1999-2002 جىلدارى) قىزمەتتەرىن اتقاردى; قازاقستان رەسپۋبليكاسى كەدەندىك باقىلاۋ اگەنتتىگىنىڭ توراعاسى، قازاقستان رەسپۋبليكاسى قارجى ۆيتسە-ءمينيسترى - كەدەندىك باقىلاۋ كوميتەتىنىڭ توراعاسى (2002-2006); پرەمەر-مينيستر كەڭسەسى باسشىسىنىڭ ورىنباسارى - قازاقستان رەسپۋبليكاسى پارلامەنتىندەگى ۇكىمەتتىڭ وكىلى (2006-2007); قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ۆيتسە-ءمينيسترى (2007 جىلى اقپان - 27 تامىز).
2007 جىلدىڭ تامىزىنان قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى. 2009-2014 جىلدارى - شىعىس قازاقستان وبلىسىنىڭ اكىمى. 2014-2015 جىلدارى – قازاقستان رەسپۋبليكاسى پرەمەر-ءمينيسترىنىڭ ورىنباسارى.
2015-2019 جىلدارى – اقتوبە وبلىسىنىڭ اكىمى.
2019 جىلدىڭ اقپان-تامىز ايلارىندا قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى بولدى.
2019-2020 ج. ج. – قازاقستان رەسپۋبليكاسى پرەمەر-ءمينيسترىنىڭ ورىنباسارى.
2020-2022 جىلدارى جامبىل وبلىسىنىڭ اكىمى بولدى.
«قۇرمەت» (1999), «پاراسات» (2007) وردەندەرىمەن، «استانا» (1998), «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «قازاقستان رەسپۋبليكاسىنىڭ كونستيتۋتسياسىنا 10 جىل» (2005) مەدالدارىمەن ماراپاتتالعان.
مارقۇممەن قوشتاسۋ ءراسىمى ماۋسىمنىڭ 11-ىندە الماتىدا وتەدى.
