بۇگىن «AMANAT» توراعاسى ەرلان قوشانوۆ ۇكىمەت مۇشەلەرىنىڭ قاتىسۋىمەن پارلامەنت ماجىلىسىندەگى پارتيا فراكتسياسىنىڭ كەڭەيتىلگەن وتىرىسىن وتكىزدى. دەپۋتاتتار 2023-2027 جىلدارعا ارنالعان «حالىقپەن بىرگە!» سايلاۋالدى باعدارلاماسىن ورىنداۋ جونىندەگى جول كارتاسىن بەكىتتى. جيىندى اشقان ەرلان قوشانوۆ پارتيانىڭ بارلىق سايلاۋالدى مىندەتتەمەسى ادامداردىڭ ءومىر ءسۇرۋ ساپاسىن جاقسارتۋعا جانە ولاردىڭ ناقتى الەۋمەتتىك ماسەلەلەرىن شەشۋگە باعىتتالعانىن اتاپ ءوتتى.
«بيىل العاش رەت پرەزيدەنتكە پرەمەر-ءمينيستردىڭ كانديداتۋراسىن «AMANAT» ۇسىندى جانە قازىر پارتيا مەن ۇكىمەت حالىق پەن مەملەكەت باسشىسىنىڭ الدىندا جاۋاپكەرشىلىگى ورتاق. الداعى ءۇش جىلدىڭ بيۋدجەتى ەرەكشە. ول پرەزيدەنتتىڭ سايلاۋالدى باعدارلاماسى مەن پارتيانىڭ ەلەكتورالدى ۋادەلەرىن ەسكەرە وتىرىپ جاسالدى. ادامدار وسى قۇجاتتاردىڭ ءار تارماعىنىڭ ورىندالۋىن كۇتىپ وتىر. دەپۋتاتتارمەن بىرگە ءاربىر مينيستر مەن اكىم وسى جۇمىس ءۇشىن دەربەس ساياسي جاۋاپتى بولادى»، - دەدى ەرلان قوشانوۆ.
بۇدان سوڭ كۇن ءتارتىبى بويىنشا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ ءسوز الدى. ول ازىرلەنگەن جول كارتاسى ازاماتتاردىڭ ءال-اۋقاتىن ارتتىرۋعا جانە ىشكى ءوندىرىستى دامىتۋعا باعىتتالعان 10 مىندەت بويىنشا 205 ءىس-شارادان تۇراتىنىنا توقتالدى.
«ساپالى تۇرعىن ۇيگە قولجەتىمدىلىكتى ارتتىرۋ ماقساتىندا بارلىق قارجىلاندىرۋ كوزى ەسەبىنەن 78 ملن. شارشى مەتردەن استام جاڭا تۇرعىن ءۇي قۇرىلىسى قامتاماسىز ەتىلەدى. 30 مىڭعا جۋىق اپاتتى جانە توزىعى جەتكەن تۇرعىن ءۇي يەلەرى جاڭا باسپاناعا كوشۋگە مۇمكىندىك الادى. 2027 جىلعا قاراي مەكتەپكە دەيىنگى ۇيىمداردا 300 مىڭ جاڭا ورىن اشىلىپ، 2 جاستان 6 جاسقا دەيىنگى ء(وتىنىش بەرگەندەر سانىنان) بالالاردى مەكتەپكە دەيىنگى تاربيەمەن جانە وقىتۋمەن قامتۋ 99%-كە دەيىن ۇلعايادى. الداعى جىلدارى جاڭادان 1,5 ملن. وقۋشى ورنى اشىلىپ، شاعىن قالالاردا، اۋدان ورتالىقتارى مەن اۋىلداردا 3 مىڭ مەكتەپ جاڭعىرتىلادى. سونداي-اق، 50 بالالار ساۋىقتىرۋ لاگەرىن قۇرۋ جوسپارلانۋدا»، - دەدى ە.جاماۋباەۆ.
ءوز كەزەگىندە فراكتسيا جەتەكشىسى «AMANAT» پارتياسىنىڭ اتقارۋشى حاتشىسى ەلنۇر بەيسەنباەۆ پارتيانىڭ سايلاۋالدى ۋادەلەرىن جۇزەگە اسىرۋ ءۇشىن قاجەت قاراجاتتىڭ ءبارى قاراستىرىلعانىن مالىمدەدى. ول سونداي-اق پارتيانىڭ وڭىرلىك جول كارتالارىن جۇزەگە اسىرۋ بويىنشا بىرقاتار مىسال كەلتىردى. اتاپ ايتقاندا، 2027 جىلعا قاراي اقمولا وبلىسىنىڭ تسەلينوگراد اۋدانىندا اۋداندىق ورتالىق اۋرۋحانا سالىنادى. 2024 جىلى جەزقازعان قالاسىندا ينسۋلت ورتالىعى اشىلادى، الماتى وبلىسىندا تاياۋ بەس جىلدا 63 مەكتەپ سالىنادى، ال ماڭعىستاۋ وبلىسىندا 2027 جىلعا قاراي اۋىز سۋ تاپشىلىعى پروبلەماسىن شەشۋ ءۇشىن 6 تۇزدان تازارتۋ زاۋىتى سالىنادى.
جيىندى قورىتىندىلاي كەلە، «AMANAT» توراعاسى ەرلان قوشانوۆ پارتيانىڭ جول كارتالارى ناقتى ورىندالۋ ينديكاتورلارى بار كەشەندى جوسپار ەكەنىن اتاپ ءوتتى.
«بۇل قۇجاتتا بارلىق الەۋمەتتىك توپتىڭ مۇددەلەرى ەسكەرىلگەن جانە ول ءار ءوڭىردى، ءار اۋدان مەن اۋىلدى قامتيدى. ماجىلىستەگى جانە بارلىق دەڭگەيدەگى ماسليحاتتارداعى پارتيامىزدىڭ دەپۋتاتتارى جول كارتالارىنىڭ جۇزەگە اسىرىلۋىنا، ونىڭ ىشىندە قارجىلاندىرۋعا قاتىستى تۇراقتى باقىلاۋ جۇرگىزۋگە ءتيىس. سايلاۋ الدىندا حالىققا بەرگەن ۋادەلەردىڭ ورىندالۋى تەك بىزگە بايلانىستى»،- دەپ باسا ايتتى پارتيا توراعاسى.
ەرلان قوشانوۆ سوڭعى سايلاۋ ناۋقانى بارىسىندا پارتياعا ازاماتتاردان 40 مىڭعا جۋىق تالاپ-تىلەك كەلىپ تۇسكەنىن ەسكە سالدى. سايلاۋشىلار داۋىس بەرگەن «حالىقپەن بىرگە!» سايلاۋالدى باعدارلاماسىنىڭ نەگىزى دە – ناق وسى ازاماتتاردان كەلگەن وتىنىشتەر. ول دەپۋتاتتاردى بەلسەندى بولۋعا جانە پارتيا قابىلداعان مىندەتتەمەلەردى ىسكە اسىرۋعا جان-جاقتى اتسالىسۋعا شاقىردى.
«اۋىلدا جۇمىس ىستەيتىن جاس دارىگەرلەرگە 10 ميلليون تەڭگە كولەمىندە كوتەرمە جاردەماقى بەرۋ – ءبىزدىڭ سايلاۋالدى ۋادەلەرىمىزدىڭ ءبىرى. بۇل باستاما بارلىق وڭىردە قولداۋ تاپتى. بۇل مەديتسينا ماماندارىنىڭ تاپشىلىعى ماسەلەسىن تۇبەگەيلى شەشۋگە مۇمكىندىك بەرەدى. وسى ۋادەنى تەزىرەك ىسكە اسىرۋ ءۇشىن دەپۋتاتتار مينيسترلىكتەرمەن بىرگە ايرىقشا باقىلاۋعا الىپ، ءىستى سوڭىنا دەيىن جەتكىزۋ كەرەك»، - دەدى ول.
فراكتسيا جيىنىنىڭ قورىتىندىسىندا ەرلان قوشانوۆ دەپۋتاتتىق كورپۋستىڭ جۇمىسىن كۇشەيتۋگە قاتىستى بىرقاتار ناقتى تاپسىرما بەردى. اتاپ ايتقاندا، سايلاۋالدى ۋادەلەردىڭ ورىندالۋىن باقىلاۋ ءۇشىن ءاربىر اماناتتىق دەپۋتاتقا جول كارتاسىنىڭ بىرقاتار تارماعى بەكىتىلەدى. جۇيەلى مونيتورينگ جۇرگىزۋ ءۇشىن پارتيا مەن ۇكىمەتتىڭ بىرلەسكەن شتابى قۇرىلىپ، ول تۇراقتى تۇردە جينالىپ تۇرادى. سونىمەن قاتار، فراكتسيا جىلىنا ءبىر رەت ۇكىمەتتىڭ جول كارتاسىن جۇزەگە اسىرۋ تۋرالى ەسەبىن تىڭدايدى.
