جۇرت جىلاپ-سىقتاپ جۇرگەندە، ءماسىموۆ ەلباسى تۋرالى كىتاپ جازباق.
كۇنى كەشە عانا قازاقستاننىڭ پرەزيدەنتى اۋىسىپ، ونىمەن قوسا قالا، كوشە اتاۋلارىنىڭ دا اۋىسىپ جاتقانىن ەستىپ-كورىپ وتىرسىزدار. جاڭا پرەزيدەنت - سەناتتىڭ بۇرىنعى سپيكەرى قاسىم-جومارت توقاەۆ.
ول كەشە ەل-حالىقتىڭ الدىندا انت قابىلداپ، قوس پالاتا دەپۋتاتتارى مەن ۇكىمەت مۇشەلەرىنىڭ، تىكەلەي ەفيردە تاماشالاعان ميلليونداعان ادامنىڭ الدىندا اتاق-ماراپات بەرىپ، ەكس-پرەزيدەنتكە، ءوزىنىڭ ساياسي ۇستازىنا سىي-قۇرمەتىن دە كورسەتۋدى ۇمىت قالدىرعان جوق. بۇل تۋرالى ايتىلدى، جازىلدى. قايتالاپ جاتپايىق.
پارلامەنتتىڭ دەپۋتاتتار مەن ۇكىمەتتەگى مينيسترلەر نۇرسۇلتان نازارباەۆپەن قيماي-قيماي قوشتاستى. كوزدەرىنە جاس الدى. كەيبىرەۋلەرى ءتىپتى تەلەكامەرا الدىندا كوز جاسىنا يە بولا المادى دا.
ءبىزدىڭ ايتپاعىمىز دا ول ەمەس. نۇرسۇلتان نازارباەۆ پرەزيدەنتتىكتەن كەتكەنىمەن، ەلدەن كەتكەن جوق قوي. ول قاۋىپسىزدىك كەڭەسىن، بيلىكتەگى دومينانت پارتيا سانالاتىن نۇر وتاندى تىزگىندەپ قالدى. ال ونىڭ قىزى داريعا نۇرسۇلتانقىزى سەناتتىڭ سپيكەرى بولىپ تاعايىندالدى.
سەناتتاعى 44 دەپۋتات قاتىسقان جاسىرىن سايلاۋدا 44 دەپۋتاتتىڭ داۋىسىن تۇگەل يەمدەنگەن داريعا نازارباەۆا سەناتتى تىزگىندەپ، ەلدەگى ەكىنشى تۇلعاعا اينالىپ شىعا كەلدى.
سوڭعى ەكى-ءۇش كۇننەن بەرگى ەلدەگى بولىپ جاتقان ساياسي پروتسەسستەردىڭ جىلدامدىعى سونشالىق، جۇرت قورىتىپ ۇلگەرە الماي دا قالدى.
ال ءوزىن نۇرسۇلتان نازارباەۆتىڭ كومەكشىسى سانايتىن كارىم ءماسىموۆ ول تۋرالى كىتاپ جازاتىنىن مالىمدەدى. بۇگىن سول كىتاپ تۋرالى، سول كىسى تۋرالى ءسوز ەتپەكپىز.
ءيا، قازاقستاننىڭ بۇرىنعى ۇكىمەتباسشىسى، قازىرگى ۇلتتىق قاۋىپسىزدىك كوميتەتىنىڭ باسشىسى – كارىم ءماسىموۆ ەكس-پرەزيدەنت نۇرسۇلتان نازارباەۆ تۋرالى كىتاپ جازادى. ءوزى سولاي دەپ مالىمدەگەن. ونى «bnews.kz» سايتى ءسۇيىنشى سۇراعانداي قىلىپ حابارلادى.
كارەكەڭ، ءوزىنىڭ كىتاپ جازاتىنى تۋرالى پارلامەنت كۋلۋارىندا مالىمدەگەن. ءبىر بىلسەك، ول كىتاپتىڭ جاسىرىن بەتتەرى بولاتىن كورىنەدى.
«نۇرسۇلتان ءابىشۇلى – ول ۇلى ادام. ول تۋرالى «ەلباسى – كومەكشىنىڭ كوزىمەن» اتتى كىتاپ جازامىن. جاسىرىن بەتتەرى بار، وتە قىزىق كىتاپ بولادى»، دەپتى دالىرەك ايتساق.
سولاي، مىنە. ول نەعىلعان جاسىرىن بەتتەر ەكەنى بىزگە دە قىزىق، ارينە. ءماسىموۆ ينتريگا جاساۋدىڭ ءماستىرى بولىپ العان با، قالاي دەدىك جانە.
ءسويتىپ، كەشە قاسىم-جومارت كەمەلۇلى انت قابىلداپ، پرەزيدەنتتىك قىزمەتىنە كىرىستى. ال تاۋەلسىزدىك العان جىلدارداعى العاشقى پرەزيدەنت نۇرسۇلتان نازارباەۆ ساياسي ىقپالىن ساقتاي وتىرىپ، قىزمەتىن بوساتتى.
نازارباەۆ پرەزيدەنتتىكتەن كەتكەندە يسيمباەۆ، ءايتىموۆا، پەرۋاشەۆ، تىلەۋحانوۆ قاتارلى دەپۋتاتتار تىكەلەي ەفيردە-اق، جىلاپ قويا بەردى.
گۇلجان قاراقۇسوۆا بولسا، نازارباەۆتى اكەسىنە تەڭەدى. مينيستر اباەۆ ءوزىن جەتىم قالعان بالاداي سەزىنەتىنىن ايتتى.
جۇرت ايتىپ جاتقاندا، كارەكەڭ جازباققا بەل بۋىپتى. ونى دا ۋاقىتى كەلگەندە كورە جاتارمىز.
ەستەرىڭىزگە سالا كەتەيىك، كارەكەڭ، كارىم ءماسىموۆ 2016 جىلدىڭ 8-قىركۇيەگىندە قر ۇلتتىق قاۋىپسىزدىك كوميتەتىنىڭ باسشىسى بولىپ تاعايىندالدى.
ول 2003-2006 جىلدار ارالىعىندا نۇرسۇلتان نازارباەۆتىڭ كومەكشىسى بولدى. شىن مانىندە پرەزيدەنتتىڭ كومەكشىسى بولىپ قىزمەت جاسادى. ونىمەن قوسا، پرەمەر-ءمينيستردىڭ كومەكشىسى دە بولدى.
ەكى مارتە پرەمەر-مينيستر كرەسلوسىنا وتىردى. 2007-2012 جىلدارى العاش رەت، سوسىن 2014-2016 جىلدار ارالىعىندا ەكىنشى مارتە. ءماسىموۆ ءتىپتى، ءبىر جىلدارى پرەزيدەنت اكىمشىلىگىنىڭ جەتەكشىسى دە بولدى.
ول ءوزىن پرەزيدەنتتىڭ كومەكشىسى سانايتىن. ول تۋرالى ءوزى اشىق ايتقان دا.
«نۇرسۇلتان ءابىشۇلى، مەن بۇنى العاش رەت ايتىپ وتىرعان جوقپىن. 2007 جىلى مەنىڭ كانديداتۋرامدى ۇسىنعاندا دا ايتقانمىن. قازىر دە سول ءسوزىمدى قايتالاعىم كەلەدى. نۇرسۇلتان ءابىشۇلى، مەن ءسىزدىڭ كومەكشىڭىز بولدىم. قازىر دە كومەكشىڭىزبىن، جانە كومەكشىڭىز بولىپ قالا بەرمەكپىن. بۇگىن وسى ءسوزىمدى دەپۋداتتار الدىندا قايتالايمىن. سەنىمدەرىڭىزگە ۇلكەن راحمەت».
بۇل كارىم ءماسىموۆتىڭ ءوز ءسوزى. 2014 جىلى قازاقستاننىڭ پرەمەر-مينيستر بولىپ قايتا تاعايىندالىپ جاتقاندا ايتقان بولاتىن.
«2007 جىلدىڭ قاڭتارىندا نۇرسۇلتان ءابىشۇلى مەنى العاش رەت پرەمەر-مينيستر ەتىپ تاعايىندادى. سول كەزدە مەن سىزگە، قانداي قىزمەتكە تاعايىنداساڭىز دا ءسىزدىڭ كومەكشىڭىز بولىپ قالا بەرەتىنىمدى ايتقانمىن. بۇگىن جانە ءبىر مارتە قايتالايمىن. مەن ءالى كۇنگە ءسىزدىڭ كومەكشىڭىزبىن. مەن ءسىزدىڭ شاكىرتىڭىزبىن. قازاقستاندى دامىتۋداعى كەلەلى ىستەرگە ارالاسۋعا مۇمكىندىك جاساعانىڭىز ءۇشىن مەن ماقتانامىن. ءوزىمنىڭ ەڭبەگىم ارقىلى مەن ءسىزدىڭ سەنىمىڭىزدەن شىعاتىنىمدى دالەلدەيمىن».
بۇل دا كارىم ءماسىموۆتىڭ ءسوزى. بۇل ءسوزى كارەكەڭ نۇرسۇلتان نازارباەۆقا 2011 جىلى ايتقان.
مىنە، سولاي. ءوزى ايتپاقشى، ەكس-پرەزيدەنت نۇرسۇلتان نازارباەۆقا ادال كومەكشى بولا بىلگەن، كارەكەڭ، ەندى ول كىسى تۋرالى كىتاپ جازباق. ال ءبىز ىسكە ءسات دەۋمەن شەكتەلەيىك.
سەرىك ايدىنۇلى
«ادىرنا» ۇلتتىق پورتالى
