Jurt jylap-syqtap júrgende, Másimov Elbasy týraly kitap jazbaq.
Kúni keshe ǵana Qazaqstannyń Prezıdenti aýysyp, onymen qosa qala, kóshe ataýlarynyń da aýysyp jatqanyn estip-kórip otyrsyzdar. Jańa prezıdent - Senattyń burynǵy spıkeri Qasym-Jomart Toqaev.
Ol keshe el-halyqtyń aldynda ant qabyldap, qos palata depýtattary men Úkimet músheleriniń, tikeleı efırde tamashalaǵan mıllıondaǵan adamnyń aldynda ataq-marapat berip, eks-prezıdentke, óziniń saıası ustazyna syı-qurmetin de kórsetýdi umyt qaldyrǵan joq. Bul týraly aıtyldy, jazyldy. Qaıtalap jatpaıyq.
Parlamenttiń depýtattar men Úkimettegi mınıstrler Nursultan Nazarbaevpen qımaı-qımaı qoshtasty. Kózderine jas aldy. Keıbireýleri tipti telekamera aldynda kóz jasyna ıe bola almady da.
Bizdiń aıtpaǵymyz da ol emes. Nursultan Nazarbaev prezıdenttikten ketkenimen, elden ketken joq qoı. Ol Qaýipsizdik keńesin, bıliktegi domınant partııa sanalatyn Nur Otandy tizgindep qaldy. Al onyń qyzy Darıǵa Nursultanqyzy Senattyń spıkeri bolyp taǵaıyndaldy.
Senattaǵy 44 depýtat qatysqan jasyryn saılaýda 44 depýtattyń daýysyn túgel ıemdengen Darıǵa Nazarbaeva Senatty tizgindep, eldegi ekinshi tulǵaǵa aınalyp shyǵa keldi.
Sońǵy eki-úsh kúnnen bergi eldegi bolyp jatqan saıası proessterdiń jyldamdyǵy sonshalyq, jurt qorytyp úlgere almaı da qaldy.
Al ózin Nursultan Nazarbaevtyń kómekshisi sanaıtyn Kárim Másimov ol týraly kitap jazatynyn málimdedi. Búgin sol kitap týraly, sol kisi týraly sóz etpekpiz.
Iá, Qazaqstannyń burynǵy Úkimetbasshysy, qazirgi Ulttyq qaýipsizdik Komıtetiniń basshysy – Kárim Másimov eks-prezıdent Nursultan Nazarbaev týraly kitap jazady. Ózi solaı dep málimdegen. Ony «bnews.kz» saıty súıinshi suraǵandaı qylyp habarlady.
Kárekeń, óziniń kitap jazatyny týraly Parlament kýlýarynda málimdegen. Bir bilsek, ol kitaptyń jasyryn betteri bolatyn kórinedi.
«Nursultan Ábishuly – ol Uly adam. Ol týraly «Elbasy – kómekshiniń kózimen» atty kitap jazamyn. Jasyryn betteri bar, óte qyzyq kitap bolady», depti dálirek aıtsaq.
Solaı, mine. Ol neǵylǵan jasyryn better ekeni bizge de qyzyq, árıne. Másimov ıntrıga jasaýdyń mástiri bolyp alǵan ba, qalaı dedik jáne.
Sóıtip, keshe Qasym-Jomart Kemeluly ant qabyldap, prezıdenttik qyzmetine kiristi. Al Táýelsizdik alǵan jyldardaǵy alǵashqy prezıdent Nursultan Nazarbaev saıası yqpalyn saqtaı otyryp, qyzmetin bosatty.
Nazarbaev prezıdenttikten ketkende Isımbaev, Áıtimova, Perýashev, Tileýhanov qatarly depýtattar tikeleı efırde-aq, jylap qoıa berdi.
Gúljan Qaraqusova bolsa, Nazarbaevty ákesine teńedi. Mınıstr Abaev ózin jetim qalǵan baladaı sezinetinin aıtty.
Jurt aıtyp jatqanda, Kárekeń jazbaqqa bel býypty. Ony da ýaqyty kelgende kóre jatarmyz.
Esterińizge sala keteıik, Kárekeń, Kárim Másimov 2016 jyldyń 8-qyrkúıeginde QR Ulttyq Qaýipsizdik Komıtetiniń basshysy bolyp taǵaıyndaldy.
Ol 2003-2006 jyldar aralyǵynda Nursultan Nazarbaevtyń kómekshisi boldy. Shyn máninde Prezıdenttiń kómekshisi bolyp qyzmet jasady. Onymen qosa, premer-mınıstrdiń kómekshisi de boldy.
Eki márte premer-mınıstr kreslosyna otyrdy. 2007-2012 jyldary alǵash ret, sosyn 2014-2016 jyldar aralyǵynda ekinshi márte. Másimov tipti, bir jyldary Prezıdent Ákimshiliginiń jetekshisi de boldy.
Ol ózin Prezıdenttiń kómekshisi sanaıtyn. Ol týraly ózi ashyq aıtqan da.
«Nursultan Ábishuly, men buny alǵash ret aıtyp otyrǵan joqpyn. 2007 jyly meniń kandıdatýramdy usynǵanda da aıtqanmyn. Qazir de sol sózimdi qaıtalaǵym keledi. Nursultan Ábishuly, men sizdiń kómekshińiz boldym. Qazir de kómekshińizbin, jáne kómekshińiz bolyp qala bermekpin. Búgin osy sózimdi depýdattar aldynda qaıtalaımyn. Senimderińizge úlken rahmet».
Bul Kárim Másimovtiń óz sózi. 2014 jyly Qazaqstannyń premer-mınıstr bolyp qaıta taǵaıyndalyp jatqanda aıtqan bolatyn.
«2007 jyldyń qańtarynda Nursultan Ábishuly meni alǵash ret premer-mınıstr etip taǵaıyndady. Sol kezde men sizge, qandaı qyzmetke taǵaıyndasańyz da sizdiń kómekshińiz bolyp qala beretinimdi aıtqanmyn. Búgin jáne bir márte qaıtalaımyn. Men áli kúnge sizdiń kómekshińizbin. Men sizdiń shákirtińizbin. Qazaqstandy damytýdaǵy keleli isterge aralasýǵa múmkindik jasaǵanyńyz úshin men maqtanamyn. Ózimniń eńbegim arqyly men sizdiń senimińizden shyǵatynymdy dáleldeımin».
Bul da Kárim Másimovtiń sózi. Bul sózi Kárekeń Nursultan Nazarbaevqa 2011 jyly aıtqan.
Mine, solaı. Ózi aıtpaqshy, eks-prezıdent Nursultan Nazarbaevqa adal kómekshi bola bilgen, Kárekeń, endi ol kisi týraly kitap jazbaq. Al biz iske sát deýmen shekteleıik.
Serik Aıdynuly
«Adyrna» ulttyq portaly
