3 ماۋسىم كۇنى 90 جاستاعى زەينەتكەردىڭ قالالىق تەلەفونىنا بەلگىسىز ەر ادام قوڭىراۋ شالىپ، قىزىنىڭ جول اپاتىنا ۇشىراپ، ەر ادامدى قاعىپ كەتكەنىن ايتقان، دەپ حابارلايدى "ادىرنا" پورتالى. بۇل تۋرالى Polisia.kz جازدى.
ول قازىر ءتۇرلى جاراقاتتارمەن اۋرۋحانادا جاتقانىن، قىلمىستىق جاۋاپكەرشىلىككە تارتپاۋ ماسەلەسىن شەشۋ ءۇشىن «رۋسلان» ەسىمدى بەلگىسىز كىسىگە قاراجات اۋدارۋ كەرەكتىگىن ءتۇسىندىردى. ءبىراز ۋاقىتتان كەيىن زەينەتكەردىڭ ءۇي تەلەفونىنا ءبىر بويجەتكەن قوڭىراۋ شالىپ، اپاتقا ۇشىراعانىن، وعان شۇعىل تۇردە 20 ميلليون تەڭگە قاجەت ەكەنىن ايتتى. مۇنداي قوڭىراۋلاردان ابدىراپ قالعان زەينەتكەر قىزىنىڭ داۋىسىنا ۇقساس بولعاندىقتان، شىنىمەن دە تەلەفون سوققان قىزى دەپ ويلاعان.
«زەينەتكەر ءوزىنىڭ بارلىق جيناعى مەن زەينەتاقىسىنان – 13 ملن تەڭگە قولىنا العان. كوپ ۇزاماي ەسىك قوڭىراۋى سوعىلدى، بەلگىسىز ەر ادام كىرىپ، اقشانى ساناپ، الىپ كەتكەن»، - دەلىنگەن حابارلامادا.
كۇدىكتىلەر ىزدەستىرىلۋدە.
ىشكى ىستەر مينيسترلىگى جىل باسىنان بەرى وسىنداي سحەما بويىنشا توعىز پاۆلودارلىق الاياقتاردىڭ «جەمىنە» ءتۇسىپ، شابۋىلداۋشىلارعا جالپى سوماسى 25 ميلليون تەڭگە بەرگەنىن اتاپ ءوتتى. بارلىق ىستەر تەرگەلۋدە.
"ادىرنا" ۇلتتىق پورتالى
