الاياقتاردىڭ قۇربانىنا اينالعاندار: جامبىل وبلىسىندا 11 ادام ادىلدىك ىزدەۋدە

3417

جامبىل وبلىسىندا الاياقتاردىڭ قارماعىنا ءىلىنىپ نەسيەنى بونۋسىمەن الامىز دەپ 11 ادام بىردەي تاقىرعا وتىرعان. وسىدان تۋرا ءبىر جىل بۇرىن بولعان وقيعادان زارداپ شەككەندەردىڭ ءىسى ءالى اياقتالماعان. ال الدانىپ ميلليونداعان قارىزعا باتقان ادامدار بانكتەن بولەك بەلگىسىز ادامداردىڭ قوقان-لوققى جاساپ، حابارلاساتىن ادامدار كوبەيگەنىن ايتادى. رەداكتسيامىزعا شاعىمدانعان جامبىل وبلىسى، اسا اۋىلىنىڭ تۇرعىنى مەيرامكۇل زاتتىبەكوۆا بولعان جايدى باستان-اياق اڭگىمەلەپ بەردى.

         تۇرمىستىڭ تاۋقىمەتى ابدەن قاجىتقان بۇل تۇرعىندار الاياقتاردىڭ ارباۋىنا تۇسەمىز دەپ ەش ويلاماعان. الايدا، ءىشى-باۋىرىنا كىرىپ، ولەردەگى ءسوزىن ايتقاندار «اڭقاۋ ەلگە ارامزا مولدانىڭ» تىرلىگىن جاساپتى.

         «وقيعا 2019 جىلعى قاڭتاردا باستالدى. ماعان 150 مىڭ تەڭگە شاماسىندا قاراجات قاجەت بولدى. سودان ءبىر باۋىرىمنىڭ كورشىسىنىڭ ۇيىندە نەسيە الىپ بەرىپ جاتقان مارجان ءادىلوۆا تۋرالى ەسىتتىم. ءبىر حابارلاسىپ ەدىم. سودان ماعان ودان بالالارىما دەيىن كۇنىنە ءجۇز مارتە قوڭىراۋ شالىپ مازا بەرمەي قويدى. «ءبىزدى بونۋس الاسىڭدار» دەپ الداپ وسى پالەگە دۋشار ەتتى. سودان تاراز قالاسىنداعى «ەۆريكا» دۇكەنىنەن الماعان زاتتارىمىزدى العان ەتىپ بىرنەشە بانكتىڭ كليەنتى ەتىپ جىبەرىپتى. ەشقانداي زات الماسام دا «ەۋرازيالىق بانك» اق جانە «بانك حوۋم كرەديت» اق-نان 2 ميلليون تەڭگە تاۋارلىق نەسيە راسىمدەتىپ جىبەرىپتى. قازىر سول الماعان نەسيەلەرىمدى تولەۋگە ءماجبۇر بولدىق. ابدەن قينالىپ كەتتىم، - دەيدى اسا اۋىلىنىڭ تۇرعىنى مەيرامكۇل زاتتىبەكوۆا.

ءىس ناسىرعا شاۋىپ قارىزعا بەلشەدەن باتقان سوڭ مەيرامكۇل بارلىق قوڭىراۋلاردى جازىپ الاتىن بولىپتى. ايتۋىنشا، بانككە تولەگەن بارلىق تۇبىرتەكتەر مەن جازىلىپ قالعان تەلەفون اڭگىمەلەرىنە دەيىن بار.

«العاشقىدا راۋشان ءادىلوۆا بىزبەن بىرگە جۇگىرىپ، ارىز جازىپ، جابىرلەنۋشىنىڭ كەيپىنە ەنگەن. كەيىن ىسپەن اينالىسقان تەرگەۋشىلەر دە، ءتىپتى ءبىزدى وسى ىسكە تارتقان ءادىلوۆانىڭ ءوزى دە ءبىزدى الداعانىن موينىنا الدى. مارگاريتا گەرمان دەگەن بىزگە نەسيە الدىرعان قاشىپ كەتىپى. كەيىن تابىلدى دەگەندى ەستىدىك. بارلىق ايعاق دالەلدەرىمىز بار. بىراق، ءالى كۇنگە دەيىن ايىپتىلار جازاسىن العان جوق. ءىس №2 تاراز قالالىق سوتىندا كوپتەن بەرى قارالىپ جاتىر. ءدال مەن سياقتى جالپى 11 ادام وسى الاياقتىڭ قۇربانى بولدىق. ابدەن جۇيكەمىز جۇقارىپ، شارشاپ كەتتىك، - دەيدى مەيرامكۇل زاتتىبەكوۆا.

ەكى ميلليون تەڭگەدەن استام قارىزعا باتقان مەيرامكۇل اپانىڭ  قازىر ءۇي ىشىنەن مازا كەتكەن. وتباسىنداعى جاعدايدان بولەك قازىر بەلگىسىز نومىرلەردەن تەلەفون شالىنىپ، قوقان-لوققى كورسەتەتەتىندەر دە تابىلىپتى.

         «ءبىز ءوز ەركىمىزبەن تولەمدەردىڭ ءبارىن اي سايىن جاساپ جاتىرمىز. چەكتەرى مەن تۇبىرتەكتەرىنىڭ ءبارى بار. ەشقايدا قاشىپ، كوشىپ كەتكەن جوقپىز. اتالعان ماسەلەنى ايتىپ شاعىمدانباعان جەرىمىز قالمادى. قالالىق، وبلىستىق پروكۋراتۋراعا، سوتقا، پوليتسيا دەپارتامەنتىنە بىرنەشە مارتە باردىق. ءبىز سياقتى الدانعان ادامدار ادامدار وتە كوپ ەكەن. كەيبىرەۋى ءتىپتى حات تانىماي، ارىزدارىن بىرەۋلەرگە جازعىزىپ جاتقاندار دا بولدى. ارادا ەكى جىلدان استام ۋاقىت وتسە دە ءىس شەشىمىن تاپپاي جاتىر. بۇل ازداي ەندى جان-جاقتان كۇنىنە بىرنەشە مارتە تەلەفون شالىپ، قوقان-لوققى جاساپ جاتىر. ولاردىڭ كىم ەكەندەرىن دە بىلمەيمىن. «بالاڭىز ايدوس بىزبەن كەزدەسسىن، قاعازدارعا قول قويسىن. ەگەر ايتقاندى ورىنداماساڭىزدار وزدەرىڭىزدى سوتقا تارتامىز» دەپ قورقىتىپ-ۇركىتەدى. ءتىپتى جۇمىس جاساۋىما دا كەدەرگىسىن تيگىزىپ جاتىر. تۇرمىسقا شىققان قىزىما دا تەلەفون شالىپ، اجىراستىرۋعا دەيىن باردى. بىردە «قالالىق اكىمدىكتەنبىز بارلىق ماتەريالدارىڭىزدى بىزگە بەرىڭىز» دەپ تانىس ەمەس نومىرلەر حابارلاسادى. بىردە بوتەن نومىرلەردەن حابارلاسىپ ءوزىمدى تەرگەۋگە الىپ، ايتقاندارىن ورىنداماسام سوتقا ارىزداناتىندارىن ايتىپ قورقىتادى. ولاردىڭ ءبارىنىڭ تەلەفوندارى مەن اۋديو جازبالارى ساقتاۋلى، - دەيدى مەيرامكۇل زاتتىبەكوۆا.

مەيرامكۇلدىڭ ايتۋىنشا، ءىس بويىنشا ماتەريالدار تەرگەۋشىلەردىڭ قولىنا ءتيىپ، №2 تاراز قالالىق سوتىندا قارالعان. بىراق ءىستىڭ قالاي بولىپ جاتقانى تۋرالى ەشكىم ءتىس جارىپ ايتپاعان.

         «ءبىز ءمان-جايدى سۇراپ ءىستىڭ قاشان شەشىمىن تاباتىنىن سۇرادىق. بىراق نە پوليتسيا دەپارتامەنتى، نە پروكۋراتۋرا، نە سوت ەش جوندەپ جاۋاپ بەرمەيدى. ءىستىڭ نە بولىپ جاتقانىنان حابارىمىز جوق، - دەيدى مەيرامكۇل زاتتىبەكوۆا.

ءبىز ماسەلەنىڭ انىق-قانىعىن انىقتاۋ ماقساتىندا №2 تاراز قالالىق سوتىنا حابارلاستىق.

         «بۇل قىلمىستىق ءىس كوپتەن بەرى قارالىپ جاتىر. حالىقتى الداپ كەتتى دەپ كۇدىككە ىلىنگەن مارگاريتا گەرمان قاشىپ كەتكەن. ونى تاۋىپ الدىردىق. ءىستى بىرىكتىرۋ ءۇشىن جاڭادان ارىز قابىلداندى. قازىر سۋديالار ءىستى تولىعىمەن قاراستىرىپ جاتىر. جاقىن ارادا شامامەن 1 اي شاماسىندا اياقتالىپ قالۋى ءتيىس، - دەيدى №2 تاراز قالالىق سوتىنىڭ توراعاسى نيزامەددين جاماشوۆ.

جابىرلەنۋشى مەيرامكۇل زاتتىبەكوۆا سوت جانە قۇقىق قورعاۋ ورگاندارىنىڭ ءىستى تىم سوزباقتاتىپ جىبەرگەنىنە الاڭداۋلى. ول ءىس شەشىمىن تاپپاسا جوعارى سوتقا جانە باس پروكۋراتۋراعا ارىز بەرۋگە نيەتتى.

ابزال الپىسبايۇلى

«ادىرنا» ۇلتتىق پورتالى

 

 

 

 

پىكىرلەر
ۇقساس جاڭالىقتار