مەملەكەت باسشىسى قاسىم-جومارت توقاەۆ "ورتالىق ازيا – ەۋروپالىق وداق" كوشباسشىلارىنىڭ ەكىنشى كەزدەسۋىندە ءسوز سويلەدى. ەۋرووداقتىڭ قازاقستاننىڭ ەڭ ءىرى ساۋدا سەرىكتەسى ەكەنىن ايتىپ، ونىڭ ۇلەسىنە سىرتقى ساۋدانىڭ 40%-دان استامى تيەسىلى ەكەنىن تىلگە تيەك ەتتى. ەلدىڭ ەۋروپاعا مۇناي تاسىمالداۋ ماقساتىنا ماڭىز قويىپ وتىرعانىن حابارلادى. بۇل جايلى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە كورسەتە وتىرىپ جازادى.
توقاەۆتىڭ ايتۋىنشا، ەنەرگەتيكالىق سەكتور قازاقستان مەن ەۋروپالىق وداقتىڭ بايلانىسىن جانداندىرعان باستى باعىتتاردىڭ ءبىرى.
- ەنەرگەتيكا سەكتورى قازاقستاننىڭ ەۋروپالىق وداقپەن ءوزارا ءىس-قيمىلىنداعى باستى باعىتتاردىڭ ءبىرى. ءبىز ەنەرگيا رەسۋرستارىن تاسىمالداۋ باعىتتارىن جانداندىرۋ جۇمىسىنا ماقساتتى تۇردە دەن قويامىز.
قازىرگى ۋاقىتتا قازاقستان مۇنايىنىڭ 80%-ى كاسپي قۇبىرىنىڭ كونسورتسيۋمى ارقىلى ەۋروپاعا تاسىمالدانادى. ورتاق مۇددەلەرگە يەك ارتا وتىرىپ، ستراتەگيالىق ماڭىزدى مۇناي قۇبىرى ارقىلى ۇزاق مەرزىمدى جانە تۇراقتى مۇناي تاسىمالداۋدى قامتاماسىز ەتۋ ءۇشىن ەو تاراپىنان قولداۋ كۇتەمىز، - دەدى پرەزيدەنت.
ەل باسشىسى ءازىربايجان مەملەكەتىمەن اراداعى ەنەرگەتيكالىق بايلانىستارعا توقتالدى.
- ازىربايجاندىق سەرىكتەستەرمەن تىعىز ىنتىماقتاستىق ورناتىپ، ترانسكاسپي باعىتىن دا دامىتىپ جاتىرمىز. مىسالى، وسى جىلدىڭ باسىنان باستاپ جىلىنا 1,5 ميلليون توننا كولەمىندەگى "اقتاۋ – باكۋ – تبيليسي – دجەيحان" باعىتى بويىنشا قازاقستاندىق مۇنايدى جونەلتۋ باستالدى.
سونىمەن قاتار، ءبىز "اقتاۋ – باتۋمي" باعىتى بويىنشا مۇناي ەكسپورتىن كەڭەيتۋدى، ترانسكاسپي مارشرۋتىنىڭ قۇبىرلارى ارقىلى مۇناي جونەلتۋ كولەمىن ۇلعايتۋدى جوسپارلاپ وتىرمىز.
قازاقستان گەرمانياعا "درۋجبا"قۇبىرى ارقىلى مۇناي جەتكىزۋدى جۇزەگە اسىرا باستادى. اعىمداعى جىلدىڭ باسىنان بەرى 90 مىڭ توننا كولەمىندە مۇناي جەتكىزىلدى. بۇل كورسەتكىشتى بولاشاقتا ونى ۇلعايتۋ مۇمكىندىگىمەن جىلىنا 1,2 ميلليون تونناعا دەيىن جەتكىزۋ الەۋەتى بار", - دەدى توقاەۆ.
مەملەكەت باسشىسى، سونىمەن قاتار، قازاقستان ەۋروپالىق وداقتاعى سەرىكتەستەرىنە 60-تان استام كەن ورنىن يگەرۋدە جەڭىلدىك بەرۋگە دايىن ەكەندىگىن ايتتى.
«ءبىز ەۋروپالىق سەرىكتەستەرىمىزگە قازاقستان اۋماعىنداعى 60-تان استام باعالى ءارى ءتۇستى مەتاللدار كەن ورىندارىن بارلاۋعا جانە وڭدەۋگە جەڭىلدىك بەرۋگە دايىنبىز»، - دەدى پرەزيدەنت.
"ادىرنا" ۇلتتىق پورتالى
