Memleket Basshysy Qasym-Jomart Toqaev "Ortalyq Azııa – Eýropalyq Odaq" kóshbasshylarynyń ekinshi kezdesýinde sóz sóıledi. Eýroodaqtyń Qazaqstannyń eń iri saýda seriktesi ekenin aıtyp, onyń úlesine syrtqy saýdanyń 40%-dan astamy tıesili ekenin tilge tıek etti. Eldiń Eýropaǵa munaı tasymaldaý maqsatyna mańyz qoıyp otyrǵanyn habarlady. Bul jaıly "Adyrna" ulttyq portaly Aqordanyń baspasóz qyzmetine silteme kórsete otyryp jazady.
Toqaevtyń aıtýynsha, energetıkalyq sektor Qazaqstan men Eýropalyq Odaqtyń baılanysyn jandandyrǵan basty baǵyttardyń biri.
- Energetıka sektory Qazaqstannyń Eýropalyq Odaqpen ózara is-qımylyndaǵy basty baǵyttardyń biri. Biz energııa resýrstaryn tasymaldaý baǵyttaryn jandandyrý jumysyna maqsatty túrde den qoıamyz.
Qazirgi ýaqytta Qazaqstan munaıynyń 80%-y Kaspıı qubyrynyń konsorıýmy arqyly Eýropaǵa tasymaldanady. Ortaq múddelerge ıek arta otyryp, strategııalyq mańyzdy munaı qubyry arqyly uzaq merzimdi jáne turaqty munaı tasymaldaýdy qamtamasyz etý úshin EO tarapynan qoldaý kútemiz, - dedi prezıdent.
El basshysy Ázirbaıjan memleketimen aradaǵy energetıkalyq baılanystarǵa toqtaldy.
- Ázirbaıjandyq seriktestermen tyǵyz yntymaqtastyq ornatyp, Transkaspıı baǵytyn da damytyp jatyrmyz. Mysaly, osy jyldyń basynan bastap jylyna 1,5 mıllıon tonna kólemindegi "Aqtaý – Baký – Tbılısı – Djeıhan" baǵyty boıynsha qazaqstandyq munaıdy jóneltý bastaldy.
Sonymen qatar, biz "Aqtaý – Batýmı" baǵyty boıynsha munaı eksportyn keńeıtýdi, Transkaspıı marshrýtynyń qubyrlary arqyly munaı jóneltý kólemin ulǵaıtýdy josparlap otyrmyz.
Qazaqstan Germanııaǵa "Drýjba"qubyry arqyly munaı jetkizýdi júzege asyra bastady. Aǵymdaǵy jyldyń basynan beri 90 myń tonna kóleminde munaı jetkizildi. Bul kórsetkishti bolashaqta ony ulǵaıtý múmkindigimen jylyna 1,2 mıllıon tonnaǵa deıin jetkizý áleýeti bar", - dedi Toqaev.
Memleket basshysy, sonymen qatar, Qazaqstan Eýropalyq Odaqtaǵy seriktesterine 60-tan astam ken ornyn ıgerýde jeńildik berýge daıyn ekendigin aıtty.
«Biz eýropalyq seriktesterimizge Qazaqstan aýmaǵyndaǵy 60-tan astam baǵaly ári tústi metalldar ken oryndaryn barlaýǵa jáne óńdeýge jeńildik berýge daıynbyz», - dedi Prezıdent.
"Adyrna" ulttyq portaly
