پرەزيدەنت قاسىم-جومارت توقاەۆ شەتەلدىك ينۆەستورلار كەڭەسىنىڭ 37-ءشى پلەنارلىق وتىرىسىندا قازاقستان ەكونوميكاسىنىڭ جاھاندىق داعدارىسقا توتەپ بەرە العانىن ايتتى. بۇل تۋرالى اقوردا جازدى، دەپ حابارلايدى "ادىرنا".
مەملەكەت باسشىسى شەتەلدىك ينۆەستورلار كەڭەسىن مەملەكەت پەن ونىڭ حالىقارالىق سەرىكتەستەرى اراسىنداعى ستراتەگيالىق ىنتىماقتاستىقتىڭ بەرىك ءارى سەنىمدى الاڭى رەتىندە سيپاتتاپ، بۇل كەڭەستىڭ الداعى ۋاقىتتا دا ءوز ميسسياسىن تابىستى جالعاستىراتىنىن اتاپ ءوتتى. ءوز سوزىندە الەمدە بولىپ جاتقان سىن-قاتەرلەردىڭ جاھاندىق ەكونوميكاعا اسەر تۋرالى دا ايتتى.
ساراپشىلار بولجامىنا سايكەس، تاياۋ جىلدارى جاھاندىق ءجىو شامامەن 2,9 پايىزعا دەيىن باياۋلايدى. بۇل جاعداي بارلىق ەلدەردە ەكونوميكالىق قىسىمدى ارتتىرادى.
«بۇگىندە ينفلياتسيالىق قىسىمنىڭ كۇشەيگەنى، جاھاندىق جەتكىزۋ تىزبەگىندەگى كەدەرگىلەردىڭ جانە ىسكەرلىك ورتاداعى باعدارسىزدىقتىڭ ارتقانى بايقالادى. مۇنداي ۇردىستەر الەم ەكونوميكاسىنىڭ پەرسپەكتيۆاسىن ناشارلاتا ءتۇسۋى ىقتيمال. بۇل حالىقارالىق سىندارلى ديالوگتىڭ قاجەت ەكەنىن كورسەتەدى. قازاقستان سەكىلدى ەلدەردىڭ ەكونوميكاسى وسىنداي سىن-قاتەرلەر كەزىندە سىرتقى داعدارىستارعا توتەپ بەرە الدى. بيىلعى بەس ايدا قازاقستان ەكونوميكاسى 6 پايىزعا ءوستى. وعان كولىك جانە لوگيستيكا، قۇرىلىس، ساۋدا، تاۋ-كەن ونەركاسىبى جانە وڭدەۋ سالالارى كوپ ۇلەس قوستى»، – دەدى پرەزيدەنت.
قاسىم-جومارت توقاەۆ بۇل ورايدا قازاقستاننىڭ ستراتەگيالىق تۇرعىدان جايلى جەردە ورنالاسۋى، ادامي كاپيتالى جانە رەفورمالاردى جان-جاقتى جۇرگىزۋى ينۆەستورلارعا دا، ۇلتتىق ەكونوميكاعا دا مول مۇمكىندىك بەرەتىنىن اتاپ ءوتتى.
