ءۇندىستاننىڭ شىعىسىندا ورنالاسقان وديشا شتاتى، بالاسور ەلدى مەكەنىندە بىرنەشە پويىزدىڭ سوقتىعىستى. سالدارىنان قازا تاپقاندار سانى 288 ادامعا دەيىن ءوستى. 900 ادام ءتۇرلى جاراقات الدى. بۇل تۋرالى BBC News اگەنتتىگى اقپاراتتاندىردى. مەملەكەت باسشىسى پرەمەر-مينيستر نارەندرا ءموديدىڭ اتىنا جەدەلحات جولدادى، دەپ جازادى "ادىرنا" ۇلتتىق پورتالى.
«شاليمار-كوروماندەل» جۇردەك پويىزى جەرگىلىكتى ۋاقىت بويىنشا ساعات 19:00 شاماسىندا رەلستەن شىققان. اپات بارىسىندا ونىڭ بىرنەشە ۆاگونى «ەسۆانتپۋر-حاورا» ەكسپرەسى جۇرەتىن باسقا جولعا ءتۇسىپ كەتتى. قارسى باعىتتا ءجۇرىپ كەلە جاتقان پويىز اۋەلى وسى ۆاگونداردى سوققان، كەيىن جولدا تۇرعان تاعى ءبىر جۇك پويىزىمەن سوقتىعىسقان.
اقپاراتتارعا سەنسەك، بۇل - ءۇندىستاندا 1980 جىلداردان بەرگى ەڭ ۇلكەن تەمىرجول اپاتى. جەرگىلىكتى بيلىك قۇربان بولعانداردىڭ سانى ارتۋى مۇمكىن ەكەندىگىن ايتادى.
اپات بولعان ايماققا 200-دەن استام جەدەل جاردەم كولىگى جەتكەن، كەزەكشىلىككە قوسىمشا 100-دەن استام دارىگەر جۇمىلدىرىلعان.
كۋاگەرلەردىڭ ايتۋىنشا، ءتىرى قالعان جولاۋشىلاردىڭ كوپشىلىگى اۋدارىلعان ۆاگونداردا قالعان ادامدارعا كومەككە كەلگەن. قۇتقارۋ جۇمىستارى جالعاسىپ جاتىر.
ءۇندىستان پرەمەر-ءمينيسترى نارەندرا مودي قازا تاپقاندار مەن زارداپ شەككەندەردىڭ تۋىستارىنا كوڭىل ايتىپ، اپات بولعان جەردە قۇتقارۋ جۇمىستارى جۇرگىزىلىپ جاتقانىن جانە زارداپ شەككەندەر قاجەتتى كومەك الۋ ءۇشىن قولدان كەلگەننىڭ ءبارى جاسالىپ جاتقانىن حابارلادى.
مەملەكەت باسشىسى قاسىم-جومارت توقاەۆ پرەمەر-مينيستر نارەندرا موديگە جانە ءۇندىستان حالقىنا تەمىرجول اپاتى سالدارىنان بولعان قايعىلى وقيعاعا بايلانىستى كوڭىل ايتىپ، جەدەلحات جولدادى.
«وديشا شتاتى، بالاسور ەلدى مەكەنىندە بولعان تەمىرجول اپاتى سالدارىنان كوپتەگەن ادامنىڭ قازا تاپقانى تۋرالى سۋىت حاباردى كۇيزەلىسپەن قابىلدادىم. جاقىندارىنان ايىرىلعان وتباسىلاردىڭ اۋىر قايعىلارىنا ورتاقتاسىپ، قازاقستان حالقىنىڭ جانە جەكە ءوزىمنىڭ اتىمنان كوڭىل ايتامىن. سونداي-اق زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن. وسىنداي ازالى ساتتە ءۇندىستان حالقىمەن بىرگەمىز»، – دەپ جازىلعان جەدەلحاتتا.
"ادىرنا" ۇلتتىق پورتالى
