Toqaev Ündıstan halqyna köŋıl aitty. Aimaqta 288 adam qaza tapty

Ündıstannyŋ şyǧysynda ornalasqan Odişa ştaty, Balasor eldı mekenınde bırneşe poiyzdyŋ soqtyǧysty. Saldarynan qaza tapqandar sany 288 adamǧa deiın östı. 900 adam türlı jaraqat aldy. Būl turaly BBC News agenttıgı aqparattandyrdy. Memleket basşysy Premer-ministr Narendra Modidıŋ atyna jedelhat joldady, dep jazady "Adyrna" ūlttyq portaly.  «Şalimar-Koromandel» jürdek poiyzy jergılıktı uaqyt boiynşa saǧat 19:00 şamasynda relsten şyqqan. Apat barysynda onyŋ bırneşe vagony «Esvantpur-Haora» ekspresı jüretın basqa jolǧa tüsıp kettı. Qarsy baǧytta jürıp kele jatqan poiyz äuelı osy vagondardy soqqan, keiın jolda tūrǧan taǧy bır jük poiyzymen soqtyǧysqan. Aqparattarǧa sensek, būl - Ündıstanda 1980 jyldardan bergı eŋ ülken temırjol apaty. Jergılıktı bilık qūrban bolǧandardyŋ sany artuy mümkın ekendıgın aitady. Apat bolǧan aimaqqa 200-den astam jedel järdem kölıgı jetken, kezekşılıkke qosymşa 100-den astam därıger jūmyldyrylǧan. Kuägerlerdıŋ aituynşa, tırı qalǧan jolauşylardyŋ köpşılıgı audarylǧan vagondarda qalǧan adamdarǧa kömekke kelgen. Qūtqaru jūmystary jalǧasyp jatyr. Ündıstan Premer-Ministrı Narendra Modi qaza tapqandar men zardap şekkenderdıŋ tuystaryna köŋıl aityp, apat bolǧan jerde qūtqaru jūmystary jürgızılıp jatqanyn jäne zardap şekkender qajettı kömek alu üşın qoldan kelgennıŋ bärı jasalyp jatqanyn habarlady. Memleket basşysy Qasym-Jomart Toqaev Premer-ministr Narendra Modige jäne Ündıstan halqyna temırjol apaty saldarynan bolǧan qaiǧyly oqiǧaǧa bailanysty köŋıl aityp, jedelhat joldady. «Odişa ştaty, Balasor eldı mekenınde bolǧan temırjol apaty saldarynan köptegen adamnyŋ qaza tapqany turaly suyt habardy küizelıspen qabyldadym. Jaqyndarynan aiyrylǧan otbasylardyŋ auyr qaiǧylaryna ortaqtasyp, Qazaqstan halqynyŋ jäne jeke özımnıŋ atymnan köŋıl aitamyn. Sondai-aq zardap şekkenderdıŋ tezırek sauyǧyp ketuıne tılektestık bıldıremın. Osyndai azaly sätte Ündıstan halqymen bırgemız», – dep jazylǧan jedelhatta.

"Adyrna" ūlttyq portaly