كەشە، 31 مامىر اشارشىلىق پەن قۋعىن-سۇرگىن قۇرباندارىن ەسكە الۋ كۇنى الماتىدا قازاقستان بوكس فەدەراتسياسى بوكستان الەم چەمپيوناتىنىڭ جەڭىمپازدارى مەن جۇلدەگەرلەرىن ماراپاتتاپ جاتتى.
31 مامىردى قۇرمەتتەۋ قايدا قالدى؟
قازاقستان بوكس فەدەراتسياسىنىڭ پرەزيدەنتى كەڭەس راقىشەۆ الەم چەمپيوندارى – سانجار تاشكەنباي، ماحمۇد سابىرحان، اسلانبەك شىمبەرگەنوۆ، نۇربەك ورالبايعا ارقايسىسى 100 مىڭ اقش دوللار، كۇمىس جۇلدەگەر دۋلات بەكباۋوۆقا 50 مىڭ اقش دوللارىن تابىس ەتتى. ودان بولەك فەدەراتسيا پرەزيدەنتى دۋلاتقا قىمبات شۆەيتسار ساعاتىن ءوزىنىڭ اتىنان تابىستادى.
قازاقستاننىڭ تۇكپىر - تۇكپىرىنەن كەلگەن چەمپيون جىگىتتەردىڭ انالارىنا كەڭەس راقىشەۆ 2 ميلليون تەڭگەدەن بەرگەن. چەمپيون مەن جۇلدەگەرلەردى عانا ەمەس، ولاردى دايىنداعان ەرلەر قۇراماسىنىڭ باس باپكەرى مىرزاعالي ايتجانوۆقا 25 مىڭ اقش دوللارى مەن بىرگە كولىك مىنگىزدى.
كورشى وزبەكستان ەلىنىڭ استاناسى تاشكەنتتە 1-14 مامىر ارالىعىندا بوكستان ەرلەر اراسىنداعى الەم چەمپيوناتى وتكەن بولاتىن. وسى سايىس ناتيجەسى بويىنشا ەلىمىز الەم چەمپيوناتتارى تاريحىنداعى مەدالدار سانى بويىنشا ءۇشىنشى ورىنعا اياق تىرەدى.
ايتا كەتەتىن جاعداي 12 ەل الەم چەمپيوناتىنا قاتىسۋدان باس تارتقان. ياعني اقش، پولشا، شۆەيتساريا، نيدەرلاند، يرلانديا، چەحيا، شۆەتسيا، كانادا، ۋكراينا، گەرمانيا مەن نورۆەگيا، ۇلىبريتانتسيا جانە سولتۇستىك يرلانديا كورولدىگى 2023 جىلعى بوكستان ەرلەر اراسىنداعى XXII الەم چەمپيوناتىنا قاتىسپادى.
ال قازاقستان بوكس فەدەراتسياسىنىڭ ءدال 31 مامىر، اشارشىلىق پەن ساياسي قۋعىن-سۇرگىن قۇرباندارىن ەسكە الۋ كۇنى ماراپات ۇلەستىرۋى تاڭعالارلىق قۇبىلىس بولعانىن ايتىپ جاتۋ ارتىق. ناۋبەت پەن زۇلماتتا شەيىت كەتكەندەردىڭ ارۋاعىن سىيلاپ، اتاۋلى كۇننىڭ قۇرمەتىن ساقتاعاندا دۇرىس بولار ما ەدى؟ ماراپاتتاۋ راسىمىنە باسقا كۇنى وتكىزگەندە ءارى-بەرىدەن سوڭ چەمپيوندار مەن جۇلدەگەرلەردىڭ ەل ىشىندەگى مارتەبەسى ءۇشىن ابىروي ەمەس پە ەدى؟
بۇعان دەيىنگى ماراپاتتارى قانداي؟
الەمدەگى ساياسي جاعدايلارعا قاراماستان وسى جارىسقا قاتىسقان قازاقستاندىق سپورتشىلار ەل قورجىنىنا 4 التىن،1 كۇمىس سالدى.
الەم چەمپيوناتىنىڭ فينالىندا 4 بىلعارى قولعاپ شەبەرى – سانجار تاشكەنباي، ماحمۇد سابىرحان، اسلانبەك شىمبەرگەنوۆ، نۇربەك ورالباي التىن مەدال يەلەندى. جالپى ەسەپ بويىنشا قازاقستان قۇراماسى تاشكەنتتەگى بوكستان الەم چەمپيوناتىن ەكىنشى ورىنمەن اياقتادى.
جاس تا بولسا الەم چەمپيوندارى اتانعان بوكسشىلار حالىقارالىق بوكس قاۋىمداستىعىنان (IBA) 200 مىڭ اقش دوللارىنان الدى. كۇمىس جۇلدەگەرلەرگە 100 مىڭ، قولا جۇلدەگەرلەردىڭ ارقايسىسىنا 50 مىڭ اقش دوللارى بەرىلدى.
بۇدان بولەك چەمپيوندار مەن جۇلدەگەرلەرگە ەلگە كەلگەن سوڭ پاتەر مەن كولىك كىلتى تابىس ەتىلدى.تەك قانا IBA مەن قازاقستان بوكس فەدەراتسياسى عانا ەمەس سپورتشىلارعا جاناشىر اكىم-شەنەۋلىكتەر، كاسىپكەرلەر بارىنشا چەمپيون باۋىرلارىن ءوز ەسەبىنەن قولداپ جاتىر. بوكسشىلاردىڭ جەرلەستەرى، اۋىلداستارى دا جوعارىدان قالماي شامالارى جەتكەنشە قۇتتىقداۋدا.
ماسەلەن كۇمىس جۇلدەگەر دۋلات بەكباۋوۆتىڭ جەرلەستەرى جامبىل وبلىسى، قوستوبە اۋىلىندا دۋلاتقا تۇلپار مىنگىزگەن.
مەملەكەت باسشىسى قاسىم-جومارت توقاەۆ تا بوكستان وتكەن الەم چەمپيوناتىنان كەلگەن جەڭىمپازدار مەن جۇلدەگەرلەردى ارنايى قابىلداپ، قۇتتىقتاپ، ماداقتاعان.
بوكس فەدەراتسياسىنىڭ مالىمەتىنە قاراعاندا، قازاقستان 2023 جىلعى 12 ەل بويكوت جاريالاعان الەم چەمپيوناتىنان كەيىن حالىقارالىق بوكس قاۋىمداستىعىنىڭ (IBA) رەيتينگىندە ءبىرىنشى ورىندا تۇر.
ءمارمار نۇرلانقىزى
