ەلوردادا ورنالاسقان №49 مەكتەپتىڭ ديرەكتورى بىرقاتار ۇيىرمە ساباقتارىن وزىنە الىپ، الايدا ەش ساباق وتپەگەنى جايلى شاعىمدانعان وقۋشىلاردىڭ ورىس تىلىندەگى ۆيدەوسى جەلىدە تاراعان ەدى. ۇلتتىق اقپارات كەڭىستىگىندە تۋعان دۇربەلەڭنەن سوڭ مەكتەپ ديرەكتورىنىڭ ءىسى ارنايى جۇمىس توبىندا قارالىپ، ناتيجەسىندە ول قىزمەتىنەن بوساتىلدى، دەپ حابارلايدى "ادىرنا" ۇلتتىق پورتالى.
استانا قالاسىنىڭ ءبىلىم باسقارماسى №49 ورتا مەكتەپتەگى جاعدايعا تۇسىنىك بەردى.
«اتالعان مەكتەپ ديرەكتورىنا قاتىستى قىزمەتتىك تەرگەۋ جۇرگىزۋ ءۇشىن باسقارمانىڭ 26 مامىرداعى №1098 بۇيرىعىنا سايكەس جۇمىس توبى قۇرىلدى. 26 مامىردا جۇمىس توبىنىڭ قورىتىندىسى بويىنشا مەكتەپ ديرەكتورىنىڭ ءىس-ارەكەتى تارتىپتىك كوميسسيانىڭ وتىرىسىندا قارالدى. بۇگىندە №49 ورتا مەكتەپتىڭ ديرەكتورى ءبىلىم باسقارماسىنىڭ 29 مامىرداعى №1113 بۇيرىعىمەن جۇمىستان شىعارىلعان»، - دەلىنگەن حابارلامادا.
ۇلتتىق اقپارات كەڭىستىگىندە تاراعان اقپاراتقا سەنسەك، مەكتەپ ديرەكتورى «ابايتانۋ»، «قازاق ادەبيەتىندەگى ەسسە جازۋدىڭ قۇرىلىمى» جانە «جاھاندىق قۇزىرەتتىلىك» سياقتى فاكۋلتاتيۆتى ساباقتار ءۇشىن اقشا الىپ وتىرعان. دەگەنمەن ۇيىرمە ساباقتارىن جۇيەلى تۇردە وتكىزبەگەن. الەۋمەتتىك جەلىدە مۇنى ورىس تىلىندە ايتىپ، وزدەرىنىڭ جاڭا بىلىمنەن قاعىلعانىن حابارلاعان وقۋشىلار جالپاق جۇرتتىڭ نازارىن اۋداردى.
«ابايتانۋ»، «قازاق ادەبيەتىندەگى ەسسە جازۋدىڭ قۇرىلىمى» جانە «جاھاندىق قۇزىرەتتىلىك» سىندى دارىستەردىڭ وتپەۋىنە شاعىمدانعان وقۋشىلاردىڭ ورىس تىلىندە ۇيدەۋ جولداۋى مەملەكەتتىك ءتىل ساياساتىنىڭ مەكتەپتە دۇرىس جۇرگىزىلمەيتىندىگىنەن حابار بەرەدى.
"ادىرنا" ۇلتتىق پورتالى
