Elordada ornalasqan №49 mekteptiń dırektory birqatar úıirme sabaqtaryn ózine alyp, alaıda esh sabaq ótpegeni jaıly shaǵymdanǵan oqýshylardyń orys tilindegi vıdeosy jelide taraǵan edi. Ulttyq aqparat keńistiginde týǵan dúrbeleńnen soń mektep dırektorynyń isi arnaıy jumys tobynda qaralyp, nátıjesinde ol qyzmetinen bosatyldy, dep habarlaıdy "Adyrna" ulttyq portaly.
Astana qalasynyń bilim basqarmasy №49 orta mekteptegi jaǵdaıǵa túsinik berdi.
«Atalǵan mektep dırektoryna qatysty qyzmettik tergeý júrgizý úshin basqarmanyń 26 mamyrdaǵy №1098 buıryǵyna sáıkes jumys toby quryldy. 26 mamyrda jumys tobynyń qorytyndysy boıynsha mektep dırektorynyń is-áreketi tártiptik komıssııanyń otyrysynda qaraldy. Búginde №49 orta mekteptiń dırektory bilim basqarmasynyń 29 mamyrdaǵy №1113 buıryǵymen jumystan shyǵarylǵan», - delingen habarlamada.
Ulttyq aqparat keńistiginde taraǵan aqparatqa sensek, mektep dırektory «Abaıtaný», «Qazaq ádebıetindegi esse jazýdyń qurylymy» jáne «Jahandyq quzyrettilik» sııaqty fakýltatıvti sabaqtar úshin aqsha alyp otyrǵan. Degenmen úıirme sabaqtaryn júıeli túrde ótkizbegen. Áleýmettik jelide muny orys tilinde aıtyp, ózderiniń jańa bilimnen qaǵylǵanyn habarlaǵan oqýshylar jalpaq jurttyń nazaryn aýdardy.
«Abaıtaný», «Qazaq ádebıetindegi esse jazýdyń qurylymy» jáne «Jahandyq quzyrettilik» syndy dáristerdiń ótpeýine shaǵymdanǵan oqýshylardyń orys tilinde úıdeý joldaýy memlekettik til saıasatynyń mektepte durys júrgizilmeıtindiginen habar beredi.
"Adyrna" ulttyq portaly
