"ەڭ جاس ەل". بەلگىلى دەموگراف قازاقستانداعى دەموگرافيا جايىندا ايتتى

بەلگىلى دەموگراف الەكسەي راكشا جۋرناليست يۋري دۋدكە بەرگەن سۇحباتىندا قازاقستاننىڭ ەرەكشەلىكتەرىن اتادى، دەپ حابارلايدى «ادىرنا» ءتىلشىسى.

«ۆدۋد» ارناسىنداعى سۇحبات بارىسىندا الەكسەي راكشا قازاقستاننىڭ رەسەيدەن ايتارلىقتاي ايىرماشىلىعى بار ەكەنىن اتاپ ءوتتى. بۇل ايىرماشىلىق تۋ كورسەتكىشىندە دە، حالىقتىڭ جاس قۇرىلىمىندا دا بايقالادى.

«قازاقستاندا ءومىر ءسۇرۋ ۇزاقتىعى رەسەيگە قاراعاندا جوعارى، ياعني ءولىم-ءجىتىم از، ال تۋ كورسەتكىشى ءالى دە جوعارى دەڭگەيدە قالىپ وتىر. ول 2,1-دەن ارتىق. حالىقتىڭ ءومىر ءسۇرۋ ساپاسى جاقساردى، بىراق داستۇرلەر سول كۇيىندە ساقتالعان»، — دەدى ول.

دۋد قازاقستاندا سوڭعى رەت 2021 جىلى بولعانىن ايتتى. سول ساپارىندا ءجۋرناليستى كوشەدە جاستاردىڭ، بالالاردىڭ كوپتىگى تاڭعالدىرعان. راكشانىڭ ايتۋىنشا، مۇنداي كورىنىس اسىرەسە ەلدىڭ باتىسى مەن وڭتۇستىگىندە بايقالادى.

«قازاقستانداعى حالىقتىڭ ورتاشاسى جاسى شامامەن 30–31 جاستى قۇرايدى جانە كورسەتكىش وتە باياۋ ءوسىپ كەلەدى. بۇل – الەمدەگى ەڭ جاس ەلدەردىڭ ءبىرى. حالىق رەسەيگە قاراعاندا شامامەن ون جىلعا جاس ءارى باياۋ قارتايادى»،– دەدى راكشا.

ونىڭ ايتۋىنشا، الەمنىڭ كوپ ەلدەرىندە كەرىسىنشە جاعداي بايقالادى. ەڭ ۇلكەن تومەندەۋ شىعىس ازيادا (جاپونيا، وڭتۇستىك كورەيا، قىتاي) تىركەلگەن. سونداي-اق ەۋروپادا دا حالىق سانى جىلدام ازايۋدا.