شانحاي ىنتىماقتاستىق ۇيىمىنا قاتىسۋشى ەلدەردىڭ مينيسترلەرى 2023-2024 جىلدارعا ۇيىمنىڭ مادەني جانە تۋريستىك استاناسى رەتىندە الماتى قالاسىن بەكىتۋ تۋرالى ۇسىنىستى قولدادى، دەپ حابارلايدى قر مادەنيەت جانە سپورت مينيسترلىگى.
اسحات ورالوۆ شانحاي ىنتىماقتاستىق ۇيىمىنا قاتىسۋشى ەلدەردىڭ مادەنيەت مينيسترلەرىنىڭ كەڭەسىنە قاتىستى. ونلاين-كەزدەسۋگە ءۇندىستان، قحر، قىرعىزستان، وزبەكستان، تاجىكستان، رەسەي جانە پاكىستان وكىلدەرى دە قاتىستى.
مينيستر الماتى قالاسىنا شىۇ-نىڭ 2023-2024 جىلدارعا مادەني جانە تۋريستىك استاناسى مارتەبەسىن بەرۋ تۋرالى ماسەلەنى كوتەردى.
«مەن كەين مىرزاعا جانە بارلىق قاتىسۋشىلارعا ءبىزدىڭ باستامامىزدى قولداعانى ءۇشىن العىس ايتامىن. بۇگىنگى تاڭدا ءبىز الماتى قالاسىندا 14 ءىس-شارانى كوزدەيتىن جوسپار ازىرلەدىك. بۇل حالىقارالىق تۋريستىك جانە مادەني فەستيۆالدار، سونداي-اق مارافوندار. قازاقستاننىڭ شىۇ-نا توراعالىعى دا اۋقىمدى مادەني باعدارلامامەن سۇيەمەلدەنەتىن بولادى. شىۇ ەلدەرىمەن بارلىق سالادا، ونىڭ ىشىندە تۋريزم باعىتى بويىنشا دا ىنتىماقتاستىقتى دامىتۋ مەن نىعايتۋدىڭ وڭ سەرپىنى بايقالادى. الماتىنىڭ مادەني جانە تۋريستىك استانا رەتىندە بەكىتىلۋى تۋريزم سالاسىنداعى كورسەتكىشتەردى جاقسارتادى. بارشاڭىزدى قازاقستانعا كەلىپ، ەلىمىزدىڭ كورىكتى جەرلەرىمەن جانە مادەنيەت سالاسىنداعى جۇمىسىمىزدىڭ ناتيجەلەرىمەن تانىسۋعا شاقىرامىن»، - دەدى قر مادەنيەت جانە سپورت ءمينيسترى اسحات ورالوۆ.
ەستەرىڭىزگە سالا كەتەيىك، قازاقستان 2023 جىلدىڭ شىلدەسىنەن 2024 جىلدىڭ شىلدەسىنە دەيىن شانحاي ىنتىماقتاستىق ۇيىمىنا توراعالىق ەتەدى.
