قازاق حانى تاۋكەنىڭ سىعاناققا جازعان جارلىعى جانە جاڭاقورعاننان، تۇركىستاننان جيناپ الىنعان جانە قازاق عىلىم اكادەمياسىنىڭ ينستيتۋتىنا وتكىزىلگەن كونە قۇجاتتار، قولجازبالار قايدا؟ بەلگىلى عالىمدار ە. ۆ. ەروفەەۆا، ۆ. ن. ناستيچ ەڭبەكتەرىن وقىساڭىز، وسىنداي سۇراققا تاپ بولاسىز. بەلگىلى فولكلورتانۋشى م. ك. بايدىلداەۆ 1976 جىلى جاڭاقورعان ەلدى مەكەنىنىڭ بايىرعى تۇرعىندارىنىڭ بىرىنەن 17-19 عع. جاتاتىن وتىز قۇجات الىپ ش. ش. ءۋاليحانوۆ اتىنداعى تاريح، ارحەولوگيا جانە ەتنوگرافيا ينستيتۋتىنا تاپسىرعان ەكەن.
سولاردىڭ ىشىندە بىزگە جەتكەن اتاقتى قازاق حانى تاۋكە جارلىعى بار ەكەن. ج. ە. ەرجانوۆتىڭ كىتابىندا كەڭەس وداعى عىلىم اكادەمياسىنىڭ ارحەولوگيا ينستيتۋتىنان سىعاناقتىڭ كونە قولجازبالارىن سۇراعان حات كوشىرمەسى كەلتىرىلەدى. ۇلكەن عالىمدار مەملەكەتتىك مەكەمەدە كوزبەن كورىپ كەيىن تاپپاي قالعان، قازاق تاريحى، سىعاناق تاريحى ءۇشىن اسا ماڭىزدى قۇجاتتار قايدا؟؟؟ كەڭەس وداعى عىلىم اكادەمياسى ارحەولوگيا ينستيتۋتى بلانكىنە جازىلعان حات نە ناتيجە بەردى؟ قولجازبالار قايدا؟
وتىراردا قازبا كەزىندە تابىلعان 14 عاس بەتتەرى جابىسىپ قالعان قولجازبا سول كەزدە لەنينگرادتاعى كريميناليستيكا ينستيتۋتىنا جىبەرىلگەن دەپ ەستىگەنبىز. لەنينگرادتتان، قازىرگى س. پەتەربۋرگ قالاسىنان قايتتى ما وتىرارلىق قولجازبا؟ وسىلاردىڭ بارلىعى قازاقستاننىڭ بايلىعى ەمەسپە؟ ولاردى ىزدەۋشىلەر قايدا؟
