Qazaqstandy sharlap, 8000 shaqyrym júgirip ótken ýltramarafonshylar Aqtaýǵa jetti

2270
Adyrna.kz Telegram
“Nomad Run” ýltramarafonshylary 8000 shaqyrymdy baǵyndyryp, Qazaqstannyń barlyq qala, eldi mekenderimen júgirip ótti. 5 marafonshy azamattyń "sportttyq seıil-cerýeni" Aqtaý qalasynda túıindeldi, dep habarlaıdy "Adyrna" ulttyq portaly. 
Aqtaýlyqtar “Nomad Run” atty marafonshylar kóshin saltanatty túrde kútip aldy. Júgirý arqyly 8000 km-di baǵyndyryp, Qazaqstannyń barlyq qala, eldi mekenin aralaǵan 5 marafonshy er-azamat Aqtaý qalasynda taban tiregen. Ózderiniń aıtýynsha, mundaı qadamnyń basty maqsaty - keleshek urpaqqa úlgi bolý, deni saý urpaq tárbıeleý. Azamattardy kútip alýǵa qalalyq jáne oblystyq ákimdik ókilderi, BAQ jáne qala turǵyndary turǵyndar qatysty.
“Men eń aldymen sizderge alǵys bildirgim keledi. Mundaı nátıje kórsetý kez-kelgenniń qolynan kelmeıtini anyq, bul - úlken jaýapkershiliktiń, batyldyqtyń, shydamdylyqtyń kórinisi. Eldi, jerdi aralap, óskeleń urpaqtyń boıyndaǵy patrıottyq sezimdi oıatý, Qazaqstannyń kórkem jerlerin nasıhattaý, ishki týrızmdi damytýǵa úles qosý maqsattaryn sportpen sheber úılestirý arqyly kópke úlgi bolyp kelesizder. Densaýlyqtaryńyz myqty bolsyn”, - dedi Aqtaý qalasy ákiminiń orynbasary Nurtas Salı.
Marafondy 5 adam júgirgen, onyń ishinde eń úlkeni - 55 jastaǵy Mendibaı Álimgazınov. Onyń aıtýynsha, keń-baıtaq Qazaqstandy sharlap,  bul belesti baǵyndyrý ońaı bolǵan joq.
“Basty maqsat - jastardy salaýatty ómir saltyn ustanýǵa shaqyrý. Marafondy bastaǵandaǵy ustanymymyz - sózben emes, áreketimiz arqyly úlgi bolý edi. Qonaqjaılyqtaryńyzǵa rahmet”, - dedi ol.
Astanadan jaıaý júgirý arqyly Aqtaýǵa jetken 5 marafonshy alǵys hatpen marapattaldy.
Marafonshylar saltanatty sharada sóz alyp, bul jetistigin Aqtaý qalasynyń 60 jyldyǵyna arnaǵanyn jetkizdi.
Oraıy kelgende aıta keteıik, ýltramarafonshylar Qazaqstannyń Gınnester rekordy kitabyna enedi.
"Adyrna" ulttyq portaly
Pikirler