استانادا ءورت سوندىرۋشىلەر ايالداما پاۆيلونىنداعى ءورتتى اۋىزدىقتادى. ءورتتىڭ شىعۋىنا كابەلدەر مەن قوقىستىڭ جانۋى سەبەپ بولعان. بۇل تۋرالىتوتەنشە جاعدايلار مينيسترلىگى مالىمدەدى، دەپ حابارلايدى "ادىرنا".
«112» پۋلتىنە نۇرماعامبەتوۆ كوشەسى مەن سارايشىق اۋدانىنىڭ قيىلىسىنداعى قوعامدىق كولىك ايالداماسىنان ءتۇتىن شىققانى تۋرالى حابارلاما تۇسكەن. وقيعا ورنىنا جەتكەن قۇتقارۋشىلار LRT جەلىسىنە جاقىن ماڭداعى سالىنىپ جاتقان نىساننىڭ ىشىندە ءورت بولىپ جاتقانىن انىقتاعان.
توتەنشە جاعدايلار مينيسترلىگىنىڭ دەرەگىنشە، ايالداما پاۆيلونىنىڭ جەرتولە بولىگىندە ءتۇتىن بايقالعان. ەلەكتر قالقانىنداعى ەلەكتر كابەلدەرى مەن قۇرىلىس قالدىقتارى ورتەنگەن. ءورتتىڭ جالپى اۋماعى 10 شارشى مەتردى قۇرادى.
قۇتقارۋشىلاردىڭ جەدەل قيمىلىنىڭ ارقاسىندا ءتىلسىز جاۋ تەز ارادا ءسوندىرىلدى.
«ورتتەن زارداپ شەككەندەر جوق. قازىرگى ۋاقىتتا جالىننىڭ شىعۋ سەبەبى انىقتالىپ جاتىر»، — دەلىنگەن ۆەدومستۆو حابارلاماسىندا.
ايتا كەتەيىك، ءورت بولعان اۋماق استاناداعى LRT قۇرىلىسى ءجۇرىپ جاتقان ماڭىزدى جول ايرىقتارىنىڭ بىرىندە ورنالاسقان.
