قازاقستاندىق ءانشى ديماش قۇدايبەرگەن امەريكالىق The World's Best بايقاۋىنا شىعىپ كەتتى. جارتىلاي فينالدا Adagio ءانىن شىرقاعان ول مۇنداي شەشىمىن "فينالدا وزىنەن جاسى كىشى ەكى انشىگە – قازاقستاندىق دانەليا تۋلەشوۆا مەن ۇندىستاندىق ليديانا نادحاسۆاراماعا جول بەرۋ" دەپ ءتۇسىندىردى.
ديماشقا بۇعان دەيىنگى اينالىمداردا ماكسيمال جوعارى بالل بەرىپ كەلگەن رۋ پول ء"بىز مۇندا الەمنىڭ ۇزدىگىن كورۋگە كەلدىك. قايدا بارا جاتقانىڭدى ءبىلدىڭ" دەپ، ءانشىنىڭ بۇل شەشىمىنە نارازىلىق ءبىلدىردى.
ءانشى بايقاۋدان كەتكەنىمەن The World's Best بايقاۋىنىڭ رەسمي پاراقشاسىندا ديماشتىڭ كورەرمەندەردەن ەڭ كوپ داۋىس جيناعانى حابارلاندى.
ال What About Us ءانىن شىرقاعان دانەليا 12 جاسار ۇندىستاندىق پيانيست ليديانا نادحاسۆارامادان جەڭىلدى. مۇنان سوڭ گراند-فينالعا وتكەن ليديانا وزگە ەكى قارسىلاسىنان وزىپ، بايقاۋدىڭ جەڭىمپازى اتاندى.
بايقاۋ كەزىندە ادىلقازىلار دانەليانى - "ۆوكال عاجايىبى", ديماشتى "التى وكتاۆا ادامى" دەپ اتاعان.
دانەليا تۋلەشوۆا - 2018 جىلى ۋكراينا تەلەارنالارىنىڭ بىرىندەگى "گولوس دەتي" شوۋىنىڭ جەڭىمپازى جانە Junior Eurovision كونكۋرسىنىڭ قاتىسۋشىسى.
ديماش قۇدايبەرگەن 2017 جىلى قىتايدىڭ Huhan TV ارناسىنداعى I am a Singer ءان بايقاۋىنا قاتىسىپ، 2-ورىن العان. وسى كونكۋرستان كەيىن ءانشى الەمگە تانىلىپ، لوندون، ماسكەۋ قالالارىندا ۇلكەن ساحنادا ءان سالعان.
"ازاتتىق" راديوسى
