ۇلتتىق بىرىڭعاي تەستىلەۋدى ەلەكتروندى فورماتقا اۋىستىرعاننان كەيىن تەست تاپسىرۋشىلارعا كالكۋلياتور، مەندەلەەۆ (حيميالىق ەلەمەنتتەردىڭ پەريودتىق جۇيەسى) جانە تۇزداردىڭ ەرىگىشتىك كەستەسى قولجەتىمدى بولدى. ولار تەستىلەۋ باعدارلاماسىنا ەنگىزىلگەن.
«وزدەرىڭىز بىلەتىندەي، كومپيۋتەردە «حيميا» ءپانىن تاپسىرۋشىلارعا مەندەلەەۆ جانە تۇزداردىڭ ەرىگىشتىك كەستەسى ۇسىنىلادى. الايدا تۇلەكتەر ونىڭ قاعاز نۇسقاسىن پايدالانۋعا رۇقسات سۇرادى. سوندىقتان، ءبىز 2023 جىلعى ۇبت-دا تەستىلەنۋشىلەردىڭ قالاۋى بويىنشا كەستەلەردىڭ قاعاز نۇسقاسىن بەرۋ تۋرالى شەشىم قابىلدادىق»، - دەپ اتاپ ءوتتى قر عىلىم جانە جوعارى ءبىلىم مينيسترلىگى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ۇلتتىق تەستىلەۋ ورتالىعى ديرەكتورىنىڭ ايتۋىنشا، تالاپكەرلەر كەستەلەردىڭ ەلەكتروندىق فورماتىن دا، قاعاز فورماتىن دا قولدانا الادى. سونداي-اق، ول تالاپكەرلەرگە قاعاز نۇسقالاردى تەك تەستىلەۋ اكىمشىلەرى ۇبت-نىڭ وزىندە بەرەتىنىن ەسكەرتتى.
ەستەرىڭىزگە سالا كەتەيىك، تەستىلەۋ كەزىندە بارلىق تالاپكەر ءۇشىن كومپيۋتەر ەكرانىندا «ماتەماتيكالىق ساۋاتتىلىق»، «ماتەماتيكا»، «ينفورماتيكا»، «فيزيكا»، «حيميا»، «گەوگرافيا» جانە «بيولوگيا» پاندەرى بويىنشا ەسەپتەردى شەشۋگە ارنالعان كالكۋلياتور بولادى.
سونىمەن قاتار، تەستىڭ وزىندە «ينفورماتيكانى» ورىس تىلىندە تاپسىرۋشىلاردا قازاق جانە اعىلشىن تىلىندە، قازاق جانە اعىلشىن تىلىندە تاپسىرۋشىلاردا ورىس جانە اعىلشىن تىلىندە، اعىلشىن تىلىندە تاپسىرۋشىلاردا قازاق جانە ورىس تىلىندە تەرميندەرىنىڭ اۋدارماسى بولادى.
تەستىلەۋ اياقتالعاننان كەيىن ءار ءپان بويىنشا تاقىرىپتىق تالداۋ ۇسىنىلادى. بۇل تەك تەستىلەۋ ناتيجەلەرىمەن ەمەس، سونىمەن قاتار ۇبت-نىڭ ەكىنشى مۇمكىندىگىنە دايىندالۋ ءۇشىن ءبىرىنشى مۇمكىندىكتە قاتەلىكتەر جىبەرگەن تاقىرىپتارمەن تانىسۋعا مۇمكىندىك بەرەدى.
