Ulttyq biryńǵaı testileýdi elektrondy formatqa aýystyrǵannan keıin test tapsyrýshylarǵa kalkýlıator, Mendeleev (Hımııalyq elementterdiń perıodtyq júıesi) jáne tuzdardyń erigishtik kestesi qoljetimdi boldy. Olar testileý baǵdarlamasyna engizilgen.
«Ózderińiz biletindeı, kompıýterde «Hımııa» pánin tapsyrýshylarǵa Mendeleev jáne tuzdardyń erigishtik kestesi usynylady. Alaıda túlekter onyń qaǵaz nusqasyn paıdalanýǵa ruqsat surady. Sondyqtan, biz 2023 jylǵy UBT-da testilenýshilerdiń qalaýy boıynsha kestelerdiń qaǵaz nusqasyn berý týraly sheshim qabyldadyq», - dep atap ótti QR Ǵylym jáne joǵary bilim mınıstrligi Ulttyq testileý ortalyǵynyń dırektory Rýslan Emelbaev.
Ulttyq testileý ortalyǵy dırektorynyń aıtýynsha, talapkerler kestelerdiń elektrondyq formatyn da, qaǵaz formatyn da qoldana alady. Sondaı-aq, ol talapkerlerge qaǵaz nusqalardy tek testileý ákimshileri UBT-nyń ózinde beretinin eskertti.
Esterińizge sala keteıik, testileý kezinde barlyq talapker úshin kompıýter ekranynda «Matematıkalyq saýattylyq», «Matematıka», «Informatıka», «Fızıka», «Hımııa», «Geografııa» jáne «Bıologııa» pánderi boıynsha esepterdi sheshýge arnalǵan kalkýlıator bolady.
Sonymen qatar, testiń ózinde «Informatıkany» orys tilinde tapsyrýshylarda qazaq jáne aǵylshyn tilinde, qazaq jáne aǵylshyn tilinde tapsyrýshylarda orys jáne aǵylshyn tilinde, aǵylshyn tilinde tapsyrýshylarda qazaq jáne orys tilinde termınderiniń aýdarmasy bolady.
Testileý aıaqtalǵannan keıin ár pán boıynsha taqyryptyq taldaý usynylady. Bul tek testileý nátıjelerimen emes, sonymen qatar UBT-nyń ekinshi múmkindigine daıyndalý úshin birinshi múmkindikte qatelikter jibergen taqyryptarmen tanysýǵa múmkindik beredi.
