قاراعاندى وبلىسىندا تاۋلىگىنە شامامەن 17 مىڭ توننا كومىر شىعارىلادى، 8,5 مىڭ توننا بولات بالقىتىلادى. ال كاسىپكەرلەر كۇن سايىن ءوز ەڭبەكتەرىمەن وبلىس ەكونوميكاسىنا 7 ملرد تەڭگە سالادى. بۇل كورسەتكىشتەر تۋرالى ورتالىق كوممۋنيكاتسيالار قىزمەتىنىڭ الاڭىندا وتكەن بريفينگتە ءوڭىر باسشىسى ەرماعانبەت بولەكپاەۆ ايتىپ بەردى.
– وتكەن تاۋلىكتە "ارسەلورميتتال تەمىرتاۋ" شاحتالارىندا 17 مىڭ توننا كومىر ءوندىرىلدى، مەتكومبيناتتا 8,5 مىڭنان استام بولات، 7 مىڭ توننا جالپاق پروكات بالقىتىلدى. ءىرى جانە ورتا ونەركاسىپ كاسىپورىندارى 9 ملرد تەڭگەگە ءونىم شىعاردى. قاراعاندىنىڭ كوتەرمە جانە لوگيستيكالىق ورتالىقتارىنان ءتۇرلى باعىتتار بويىنشا 80-نەن استام تەمىر جول قۇرامدارى مەن اۆتوماشينالار جونەلتىلدى، – دەدى ەرماعانبەت بولەكپاەۆ. – بۇل ناتيجەلەر ءبىزدىڭ وبلىسىمىز ەلىمىزدىڭ ماڭىزدى يندۋستريالىق، كاسىپكەرلىك جانە لوگيستيكالىق ورتالىعى بولىپ تابىلاتىنىن كورسەتەدى.
ءوڭىر باسشىسىنىڭ مالىمەتىنشە، جىل باسىنان بەرى قاراعاندى وبلىسىندا 1,1 ترلن تەڭگەگە ءونىم وندىرىلگەن. ءوسىم فارماتسەۆتيكا، ماشينا جاساۋ، جەڭىل ونەركاسىپ، قاعاز جانە قاعاز ونىمدەرىن، تاماق ونىمدەرىن ءوندىرۋ سياقتى سالالاردا بايقالادى.
