قاراعاندىدا باتىرلار كۇنىنە وراي ۇيىمداستىرىلعان «باتىرلار مۇراسى» ونكۇندىگى ءوز مارەسىنە جەتتى. بيىلعى شارانىڭ ەرەكشەلىگى — تاريحي جاۋىنگەرلىك ۇراندارعا باسىمدىق بەرىلۋى.
مەرەكەلىك ءىس-شارالاردا 31775 اسكەري ءبولىمىنىڭ ساربازدارى ۇلتتىق ءداستۇرلى ۇرانداردى شاقىرىپ، «الاش!»، «ارۋاق!»، «ابىلاي!» دەپ دابىل قاقتى.
رەسپۋبليكالىق Qazaq club جانىنداعى اكادەميك تەمىرعالي كوكەتاي اتىنداعى ورتالىقتىڭ جەتەكشىسى نۇرجان سۇرشاۇلى بىلاي دەدى:
— «الاش!» ۇرانى — قازاق حالقىنىڭ بىرلىگىنىڭ نىشانى. «ارۋاق!» ۇرانى سوعىس دالاسىندا ايتىلىپ، اتا-بابا جولىن جالعاۋ مەن وتاندى قورعاۋعا دەگەن قايسارلىقتى بىلدىرگەن. ال «ابىلاي!» ۇرانى ءۇش ءجۇزدى ءبىر تۋدىڭ استىنا توپتاستىرعان حان ابىلايدىڭ 1729 جىلعى اڭىراقاي شايقاسىنداعى جەڭىسىنەن كەيىن كەڭىنەن تانىمال بولدى. بۇل ۇران قازاقتىڭ بارلىق جۇزدەرىنىڭ بىرلىك يدەياسىن بەينەلەيدى.
31775 اسكەري بولىمىندە «باتىرلار اللەياسىنا» گۇل شوقتارى قويىلدى.
سالتاناتقا №35 مەكتەپتىڭ «جاس سارباز» سىنىپتارىنىڭ وقۋشىلارى دا قاتىستى.
اسكەري قىزمەتشىلەر بيىل مەرەيتويلارى اتالىپ ءوتىپ جاتقان بىرقاتار داڭقتى باتىرلار تۋرالى بايانداما جاسادى:
- اتاقتى قولباسشى باۋىرجان مومىشۇلىنىڭ تۋعانىنا — 115 جىل;
- حالىق باتىرى مالىك عابدۋلليننىڭ — 110 جىلدىعى;
- باتىر سۇلتان بايماعامبەتوۆ پەن جازۋشى-جاۋىنگەر كامەن ءورازاليننىڭ — 105 جىلدىعى;
- قر بۇرىنعى قورعانىس ءمينيسترى، ارميا گەنەرالى مۇحتار التىنبايدىڭ — 80 جىلدىعى.
ونكۇندىك اياسىندا قاراعاندى جوعارى پوليتەحنيكالىق كوللەدجىندە ستۋدەنتتەرگە ارنالعان عىلىمي-تانىمدىق كونفەرەنتسيا ءوتتى.
